ವಲಸೆಗಾರರು ಯಾರನ್ನು ಮೆಚ್ಚಿಸಲು ಬರೆಯಬೇಕು?

0

ಸುಮಾರು ವರ್ಷಗಳಿಂದ ನಾನಿರುವ ಅಮೇರಿಕದಲ್ಲಿ ಎನ್.ಅರ್.ಐ. ಲೇಖಕರು ಸೃಷ್ಟಿಸುತ್ತಿರುವ ಕನ್ನಡ ಲೇಖನಗಳನ್ನು ಓದುತ್ತಾ ಬಂದಿದ್ದೇನೆ. ಈ ನಡುವೆ ಕಥಾಸಂಕಲನಗಳು, ಮುಂತಾದವು ಪುಸ್ತಕ ರೂಪದಲ್ಲಿ ಪ್ರಕಟಗೊಳ್ಳುವುದು, ಅದಕ್ಕೆ ಭಾರತದಿಂದ ಬಂದ ಕವಿಗಳು/ಕಥೆಗಾರರು ಮುನ್ನುಡಿ ಬರೆದು, ಪುಸ್ತಕ ಬಿಡುಗಡೆ ಮಾಡಿ, ಶುಭಹಾರೈಸಿ ಹೋಗುವುದು ನಡೆಯುತ್ತಲೇ ಇದೆ. ಇವೆಲ್ಲ ಈ ಲೇಖಕರು ತಾವೇ ಸ್ವಂತ ಖರ್ಚು ಹಾಕಿ ಪ್ರಕಟಿಸಿರುವ ಪುಸ್ತಕಗಳು. ಹಾಗಿದ್ದ ಮೇಲೆ, ಇದರ ಗುಣಮಟ್ಟ ಎಂತಹದ್ದಿರಬಹುದು ಎಂಬ ಪ್ರಶ್ನೆ ಏಳುವುದು ಸಹಜವೆ. ನನಗನ್ನಿಸುವ ಹಾಗೆ ಇವೆಲ್ಲ ಸುಮಾರು ಒಳ್ಳೆಯ "ಟೈಮ್ ಪಾಸ್" ತರಹದ ಮುದ ನೀಡುವ ಕೃತಿಗಳು. ಆದರೆ, ಯಾವುದೇ "ಆವರಣ" ದಂತಹ ಗಂಭೀರ ಚರ್ಚೆಗೆ ಗುರಿಪಡಿಸುವಂತಹ ಮೇರುಕೃತಿಯಲ್ಲ. ಹೀಗೆ ಬರೆದ ಮರುಕ್ಷಣ ಅನ್ನಿಸಿದ್ದು, ನಾನೇಕೆ ಆವರಣದ ಜೊತೆ ಎನ್.ಅರ್.ಐ. ಕೃತಿಗಳನ್ನು ತಾಳೆ ಹಾಕುತ್ತಿದ್ದೇನೆ? ಇವಕ್ಕೆ ಇವರದ್ದೇ ಒಂದು ಸ್ವಂತ ಸ್ಥಾನವಿಲ್ಲವೇ?

ಹೌದು, ಇವರಿಗೆ ಒಂದು ಸ್ಥಾನವಿದೆ. ಅದೇನೆಂದರೆ, ಒಂದು ಪುಟ್ಟ ಮಗು ಚೆನ್ನಾದ ಚಿತ್ರ ಬಿಡಿಸಿದಾಗ, ದೊಡ್ಡವರು- ಚೆನ್ನಾಗಿದೆ ಮರಿ, ಇನ್ನೂ ಬರೆ, ನಿನಗೆ ಒಳ್ಳೆಯ ಭವಿಷ್ಯವಿದೆ- ಎಂದು ಬೆನ್ನು ತಟ್ಟಿ ಮುಂದೆ ಹೋಗುವ ಸ್ಥಾನ. ಯಾರೂ ಕನ್ನಡ ಸಾಹಿತ್ಯದಲ್ಲಿ ಇವರದೂ ಒಂದು ಪಾತ್ರವಿದೆಯೆಂದು ಗುರುತಿಸದ ಸ್ಥಾನ. ಭಾರತದಲ್ಲಿ ನಡೆಯುವ ಕನ್ನಡ ಕೃಷಿ "ಮೇಯಿನ್ ಸ್ಟ್ರೀಮ್", ಇಲ್ಲಿ ನಡೆಯುವುದು ಸಂತೃಪ್ತ ಮನಸ್ಸು ತಿಂದು ತೇಗಿ, ಬೀಗಿ ಬರೆಯುವ "ಹಾಬಿ" ಯ ಬರಹ. ಹೀಗಂತ ಬೆನ್ನ ಹಿಂದೆ ಹೇಳಿರುವ ಭಾರತದ ಲೇಖಕರು ಇದ್ದಾರೆ. ಹೌದಪ್ಪ ಹೌದು ಎಂದು ಅವರ ವಾಕ್ಯವೆಲ್ಲ ವೇದವೆನ್ನುವಂತೆ ಅಮೆರಿಕನ್ನಡಿಗರು ಸಹ ಅದಕ್ಕೆ ತಲೆಯಲ್ಲಾಡಿಸಿದ್ದಾರೆ. ಇದು ನಿಜವೇ? ಹಾಗಿದ್ದರೆ ನಾವೇಕೆ ಅವರನ್ನು ಮೆಚ್ಚಿಸಲು ಬರೆಯಬೇಕು? ನಾವೇಕೆ ಇವರ ಕಣ್ಣಲ್ಲಿ ಬೆಳಗಬೇಕೆಂದು ಒದ್ದಾಡಬೇಕು? ಗುಡಿಸಲಲ್ಲಿ ಮಲಗಿ, ಕೊಳಚೆಗೇರಿಯಲ್ಲಿ ಜೀವನ ಸವಿಸುವ ಪಾತ್ರಗಳು ಮಾತ್ರ ಪ್ರಶಸ್ತಿಗೆ ಲಾಯಕ್ಕೋ? ಹವಾನಿಯಂತ್ರಿತ ಕ್ಯೂಬಿಕಲ್ನಲ್ಲಿ ಕುಳಿತಿದ್ದು, ಕಾರಿನಲ್ಲಿ ಮನೆಗೆ ತೆರಳುವ ಪಾತ್ರಗಳ ಬದುಕಿನಲ್ಲಿ ಗೋಳೇ ಇಲ್ಲವೋ? ಹಾಗಿದ್ದಲ್ಲಿ ಇಲ್ಲಿನ ಮಾನಸಿಕ ಆಸ್ಪತ್ರೆಗಳಲ್ಲಿ ಕ್ಯೂ ಯಾಕಿರುತ್ತೆ?

ನಾನೇನು ಕನ್ನಡ ಪಂಡಿತೆಯಲ್ಲದಿದ್ದರೂ ನನಗನ್ನಿಸುವುದು, ಇಲ್ಲಿನ ಬರಹಗಾರರು ತಮ್ಮ ಭಾರತದ ಸಂಕೋಲೆ ಕಳಚಿ, ಸ್ವತಂತ್ರವಾಗಿ ತಮ್ಮ ಆತ್ಮವನ್ನು ಮಾತ್ರ ಮೆಚ್ಚಿಸಲು ಬರೆಯುವ ಸಮಯ ಬಂದಿದೆ. ಕಥಾವಸ್ತುಗಳಿಗೇನು ಇಲ್ಲಿ ಬರವಿಲ್ಲ. ಬರವಿರುವುದು ಅವನ್ನು ಮನಮುಟ್ಟುವಂತೆ ರೂಪಿಸುವ ಕಥೆಗಾರರದು. ಇಲ್ಲಿ ಸ್ವಲ್ಪ "ಫ಼ೀಲ್ ಗುಡ್" ಶೈಲಿಯಲ್ಲಿ ಬರೆಯುವ ಜನ ಜಾಸ್ತಿ. ಸ್ವಂತದ್ದು ಬರೆಯುವ ತೊಂದರೆ ತೆಗೆದುಕೊಳ್ಳದೆ, ಬರೀ ಇಂಗ್ಲಿಷ್ ಅನುವಾದಗಳನ್ನು ಮಾಡುವ ಸೋಮಾರಿಗಳು ಜಾಸ್ತಿ. ಕೆಲವರು ಒಂದೇ "ರಟ್" ನಲ್ಲಿ ಸುತ್ತುತ್ತಿರುತ್ತಾರೆ. ಇಲ್ಲವೇ ಭಾರತದ ತಮ್ಮ ಮೆಚ್ಚಿನ ಲೇಖಕರನ್ನು ಅನುಕರಿಸಲು ಹೊರಟಿರುತ್ತಾರೆ. ಇವರೆಲ್ಲಾ ಮುಂದೆ ಬಂದು ಸೃಜನಾತ್ಮಕ ಕೃತಿ ರಚನೆ ಮಾಡಿದಲ್ಲಿ ಅನಿವಾಸಿಗಳ ಕನ್ನಡ ಲೇಖನಗಳಲ್ಲಿ ಸತ್ವ ಕಂಡುಬರುವುದರಲ್ಲಿ ಸಂಶಯವೇ ಇಲ್ಲ. ನಾವೆಲ್ಲಾ ಭಾರತದಿಂದ ಆಮದು ಮಾಡಿಕೊಂಡು ನಮ್ಮ ಪುಸ್ತಕ ಭಂಡಾರವನ್ನು ಹೆಚ್ಚಿಸುವುದರ ಬದಲು, ನಮ್ಮ ಹಿತ್ತಲಲ್ಲೆ ಬೆಳೆದ ಶುದ್ಧ ತಳಿಯಿಂದ ಭಂಡಾರವನ್ನು ತುಂಬಬಹುದು.

ಬ್ಲಾಗ್ ವರ್ಗಗಳು: 
‍ನಿಮಗೆ ಈ ಬರಹ ಇಷ್ಟವಾಯಿತೇ? ತಿಳಿಸಿ: 
No votes yet
To prevent automated spam submissions leave this field empty.

ಪ್ರತಿಕ್ರಿಯೆಗಳು

ನಿಮ್ಮ ವಿಚಾರಧಾರೆ ತುಂಬಾ ಚೆನ್ನಾಗಿದೆ..ಹೊಸದೊಂದು ಒಳನೋಟ..

ಬದುಕಲಿ ದ್ವಂದ್ವ ಎಂದು ಕೈ ಬಿಡದು,
ಮನಕ್ಕೆ ತರ್ಕ ರುಚಿಸಲಿಲ್ಲ,
ಬದುಕು ಭಾವನೆಗೆ ಬಗ್ಗಲಿಲ್ಲ...

ನಿಮಗೆ ಈ ಪ್ರತಿಕ್ರಿಯೆ ಇಷ್ಟವಾಯಿತೇ? ತಿಳಿಸಿ: 
To prevent automated spam submissions leave this field empty.

ಪ್ರತಿಕ್ರಿಯೆಗೆ ಧನ್ಯವಾದಗಳು ಅಭಿಮಾನಿ, ಮತ್ತೊಮ್ಮೆ ನನ್ನೀ ಹೊಸಮನೆಗೆ ತಪ್ಪದೆ ಬನ್ನಿ.

ನಿಮಗೆ ಈ ಪ್ರತಿಕ್ರಿಯೆ ಇಷ್ಟವಾಯಿತೇ? ತಿಳಿಸಿ: 
To prevent automated spam submissions leave this field empty.

ಅಮೇರಿಕನ್ನಡಿಗರು ಅಮೇರಿಕೆಯನ್ನು ಕನ್ನಡಿಗರ ಎರಡನೇ ಮನೆಯನ್ನಾಗಿಸಿದ್ದಾರೆ. ತುಂಬಾ ನನ್ನಿ. ಕರ್ನಾಟಕದ ಕೊಂಡಿಯನ್ನು ಕಳಚಿದರೂ ಕನ್ನಡದ ಕೊಂಡಿ ಬಿಗುವಾಗಿರಲಿ, ಕನ್ನಡದ ದೀವಿಗೆ ಎಂದೆಂದೂ ಎದೆಗುಂಡಿಗೆಯಲಿ ಬೆಳಗುತಿರಲಿ.

ನಿಮಗೆ ಈ ಪ್ರತಿಕ್ರಿಯೆ ಇಷ್ಟವಾಯಿತೇ? ತಿಳಿಸಿ: 
To prevent automated spam submissions leave this field empty.

ಧನ್ಯವಾದಗಳು ಸಂಗನಗೌಡರೆ, ಮತ್ತೆ ಭೇಟಿ ನೀಡಿ.

ನಿಮಗೆ ಈ ಪ್ರತಿಕ್ರಿಯೆ ಇಷ್ಟವಾಯಿತೇ? ತಿಳಿಸಿ: 
To prevent automated spam submissions leave this field empty.

ಕಲ್ಪನಾ ಅವರಿಗೆ ನಮಸ್ಕಾರ.

ನಾನು ತಿಳಿದಿರುವಂತೆ ಡಾ|ಗುರುಪ್ರಸಾದ್ ಕಾಗಿನೆಲೆ ಅವರು ಅಮೆರಿಕದ ಜೀವನಶೈಲಿಯ ವಸ್ತುಗಳನ್ನೇ ಬಹುಮಟ್ಟಿಗೆ ಆರಿಸಿ ಕಥೆಗಳನ್ನು ಬರೆದಿದ್ದಾರೆ, ಬರೆಯುತ್ತಿದ್ದಾರೆ. ಅವರ ಕಥಾಸಂಕಲನಗಳನ್ನು ಓದಿರುವಿರಾ? ( ಶಕುಂತಳಾ ತಂದ ಹೊಸ ಹುರುಪು - ಪ್ರೊ|.ಎಂ.ಎಸ್.ಶ್ರೀರಾಮ್ ಅವರಿಂದ ಡಾ|ಗುರು ಕಾಗಿನೆಲೆಯವರ ಕಥಾಸಂಕಲನದ ಬಗ್ಗೆ ವಿಮರ್ಶೆ ನೋಡಿ.)

ಹಾಗೆಯೇ ಅಮೆರಿಕದಲ್ಲಿನ ’ಕನ್ನಡ ಸಾಹಿತ್ಯರಂಗ’ವು ಎರಡುವರ್ಷಗಳ ಹಿಂದೆ ’ಆಚೀಚೆಯ ಕಥೆಗಳು’ ಎಂಬ ಕಥಾಸಂಕಲನವನ್ನು ಹೊರತಂದಿತ್ತು. ಅದರಲ್ಲಿನ ಹೆಚ್ಚಿನ ಕಥೆಗಳು ಇಲ್ಲಿನ ಬರಹಗಾರರು ರಚಿಸಿದವೇ ಅಗಿವೆ. ಈ ಕಥಾಸಂಕಲನಕ್ಕೂ ವಿವಿಧಕಡೆಗಳಿಂದ ಮೆಚ್ಚುಗೆ (ತೋರಿಕೆಗೆ ಅಲ್ಲ, ನಿಜವಾಗಿ) ಬಂದಿರುವುದನ್ನು ಗಮನಿಸಿದ್ದೇನೆ.

ನೀವು ಪ್ರಸ್ತಾಪಿಸಿದ ಇಂಗ್ಲಿಷ್ ಅನುವಾದಿತ ಕಥೆಗಳ ವಿಚಾರ ನನಗೆ ಅಷ್ಟೇನೂ ಗೊತ್ತಿಲ್ಲ.

ನಿಮಗೆ ಈ ಪ್ರತಿಕ್ರಿಯೆ ಇಷ್ಟವಾಯಿತೇ? ತಿಳಿಸಿ: 
To prevent automated spam submissions leave this field empty.

ಹೌದು. ಡಾ||ಕಾಗಿನೆಲೆಯವರ ಕಥೆಗಳನ್ನು ಓದಿ, ಕೆಲವನ್ನು ಮೆಚ್ಚಿದ್ದೇನೆ. ನನ್ನ ಬ್ಲಾಗು ಓದಿ, ಪ್ರತಿಕ್ರಿಯಿಸಿದ್ದಕ್ಕೆ ಧನ್ಯವಾದಗಳು.

ನಿಮಗೆ ಈ ಪ್ರತಿಕ್ರಿಯೆ ಇಷ್ಟವಾಯಿತೇ? ತಿಳಿಸಿ: 
To prevent automated spam submissions leave this field empty.

ಕಲ್ಪನಾ ಅವರಿಗೆ, ನಮಸ್ಕಾರ.

ಡಾ|ಕಾಗಿನೆಲೆಯವರು ಬರೆದ ಕೆಲವು ಕಥೆಗಳು ನಿಮಗೆ ಮೆಚ್ಚುಗೆಯಾಗಿವೆಯೆಂದು ತಿಳಿದು ಬಹಳ ಸಂತೋಷವಾಯಿತು. ಹೀಗೆ ನಿಮಗೆ ಮೆಚ್ಚುಗೆಯಾಗುವ ಸಾಹಿತ್ಯ ನಿಮ್ಮ ಹಿತ್ತಲಲ್ಲೇ ಇನ್ನೂ ಸೊಂಪಾಗಿ ಬೆಳೆಯುತ್ತದೆಯೆಂದು ಆಶಿಸೋಣ.

ಇತಿ

ಶ್ರೀವತ್ಸ ಜೋಶಿ

ನಿಮಗೆ ಈ ಪ್ರತಿಕ್ರಿಯೆ ಇಷ್ಟವಾಯಿತೇ? ತಿಳಿಸಿ: 
To prevent automated spam submissions leave this field empty.