"ಜಿಹಾದ್" ಎಂದರೇನು?

To prevent automated spam submissions leave this field empty.

ನಮ್ಮಲ್ಲಿ ಧಾರ್ಮಿಕ ವಿದ್ಯೆಗಾಗಿ "ಮದ್ರಸಾ" ಗಳಿಗೆ ಮಕ್ಕಳನ್ನು ಕಳಿಸುವುದಿದೆ. ಅಲ್ಲಿ ಕುರಾನ್ಅನ್ನು ಉರು ಹೊಡೆಯುವುದು, ನಮಾಜ್ ಯಾವ ರೀತಿ ಮಾಡುವುದು ಮತ್ತು ಇತರೆ ಧಾರ್ಮಿಕ ಸಂಗತಿಗಳನ್ನು ಹೇಳಿ ಕೊಡುತ್ತಾರೆ. ಮದರಸಾ ಶಿಕ್ಷಣ ಪಡೆದ ನಾನು ಪ್ರಪ್ರಥಮವಾಗಿ ಜಿಹಾದ್ ಎನ್ನುವ ಪದ ಕೇಳಿದ್ದು ೨೦೦೧ ರಲ್ಲಿ. ಅಮೆರಿಕೆಯ ಮೇಲೆ ನಡೆದ ಧಾಳಿಯಲ್ಲಿ ಅಮೇರಿಕಾ ಮತ್ತು ಇತರೆ ಪಾಶ್ಚಾತ್ಯ ರಾಷ್ಟ್ರಗಳ ರಾಜಕೀಯ ಪಂಡಿತರುಗಳು ಉಪಯೋಗಿಸಿದ ಪದದಿಂದ ನನಗೆ ಪ್ರಥಮವಾಗಿ ಜಿಹಾದ್ ಪದದ ಪರಿಚಯವಾಯಿತು. ಇನ್ನು ಮುಸ್ಲಿಮರಿಗೆ ಧಾರ್ಮಿಕ ಆಚರಣೆಗಳ ರೀತಿ ಜಿಹಾದ್ ಅನ್ನೂ ಹೇಳಿ ಕೊಟ್ಟು, ಜಿಹಾದ್ ಅಂದರೆ ಯುದ್ಧ, ಸಿಕ್ಕ ಸಿಕ್ಕವರನ್ನು ಕೊಲ್ಲುವುದು ಎಂದಿದ್ದರೆ ವಿಶ್ವ ಈ ರೀತಿಯಲ್ಲಿ ಖಂಡಿತಾ ಇರುತ್ತಿರಲಿಲ್ಲ. ೧೭೦ ಕೋಟಿ ಮುಸ್ಲಿಮ್ ಜನಸಂಖ್ಯೆಯಿರುವ ಪ್ರಪಂಚದಲ್ಲಿ ಈ ತೆರನಾದ ನಿರರ್ಥಕ ಹಿಂಸೆಯಲ್ಲಿ ತೊಡಗಿಸಿಕೊಂಡವರು ಕೆಲವೇ ಲಕ್ಷಗಳಷ್ಟು ದುರುಳರು, ಧರ್ಮ ದ್ರೋಹಿಗಳು. ಬಹುಪಾಲು ಮುಸ್ಲಿಮರು ಎಲ್ಲರಂತೆ ದುಡಿಯುತ್ತಾ, ತಮ್ಮ ಕುಟುಂಬದ ಶ್ರೇಯಸ್ಸಿಗಾಗಿ ಶ್ರಮ ಪಡುತ್ತಿರುವವರು. ಅವರಿಗೆ ಹಿಂಸೆ ಬೇಕಿಲ್ಲ. ಅವರಿಗೆ ಬೇಕಿರುವುದು ರೋಟಿ, ಕಪಡಾ, ಔರ್ ಮಕಾನ್. ತಿನ್ನಲು ಆಹಾರ, ಉಡಲು ಬಟ್ಟೆ, ಮತ್ತು ತಲೆಯ ಮೇಲೊಂದು ಸೂರು.        


ಆಸ್ಟ್ರೇಲಿಯಾದಲ್ಲಿ ಜಿಹಾದ್ ನ ಬಗ್ಗೆ ಒಂದು ಸಮ್ಮೇಳನದಲ್ಲಿ ಮಾತನಾಡಿದ ಇಸ್ಲಾಮೀ ವಿಧ್ವಾಂಸರು ಹೇಳಿದ್ದು, ಜಿಹಾದ್ ಎಂದರೆ ಶ್ರಮ ಎಂದು ಹೇಳುತ್ತಾ ಒಂದು ಒಳ್ಳೆಯ ಸುಸಂಸ್ಕೃತ ಸಮಾಜ ಕಟ್ಟಲು ವಿಶ್ವದ ಎಲ್ಲಾ ದೇಶಗಳ ಥರಾ ಆಸ್ಟ್ರೇಲಿಯಾ ದೇಶದ ಸರಕಾರ ಸಹ ಜಿಹಾದ್ ಇಲಾಖೆಗಳನ್ನು ಹೊಂದಿದೆ, ಅದೆಂದರೆ ಗೃಹ ಅಥವಾ ರಕ್ಷಣಾ ಇಲಾಖೆ, ಕುಟುಂಬ ಕಲ್ಯಾಣ ಇಲಾಖೆ  ಮತ್ತು ವಿದ್ಯಾ ಇಲಾಖೆ. ಅದರ ಅರ್ಥ ಸಮಾಜದ ರಕ್ಷಣೆ, ಒಳಿತು ಮತ್ತು ಉನ್ನತಿಗಾಗಿ ಜನ ನೇಮಿಸಿದ, ಆರಿಸಿದ ಸರಕಾರ ಪರಿಶ್ರಮ ಪಡುವುದು ಎಂದು.


ಜಿಹಾದ್ ಪದದ ಮೂಲ "ಜಹ್ದ್" ಎನ್ನುವ ಪದದಿಂದ. ಅದರ ಅರ್ಥ ಶ್ರಮ ವಹಿಸುವುದು. ಒಬ್ಬ ದುಶ್ಚಟ ಬಿಡಲು, ಕುಡಿತ ಬಿಡಲು , ಜೂಜಾಟ ಬಿಡಲು ಪರಿಶ್ರಮಿಸುವ ಹಾಗೆಯೇ ಜಿಹಾದ್ ಎನ್ನುವುದು ಸಹ ಒಳ್ಳೆಯ ನಡತೆಗೆ ಒಬ್ಬ ಮಾಡುವ ಪರಿಶ್ರಮ. ಮೇಲೆ ಹೇಳಿದ ಮೂಲ ಪದದಿಂದ ಬಂದ ಮತ್ತೆರಡು ಪದಗಳೆಂದರೆ ಇಜ್ತಿಹಾದ್, ಮತ್ತು ತಹಜ್ಜುದ್.


ಇಜ್ತಿಹಾದ್ ಎಂದರೆ  ಜ್ಞಾನಾರ್ಜನೆ ಎಂದು. ಈ ಇಜ್ತಿಹಾದ್ ನ ಪರಿಣಾಮವೇ ಒಂದು ಸಾವಿರ ವರ್ಷಗಳಿಗೂ ಮೊದಲು ಬಾಗ್ದಾದ್, ಕೈರೋ ಮತ್ತು ಡಮಾಸ್ಕಸ್ ನಗರಗಳಲ್ಲಿ ವಿಶ್ವವಿಖ್ಯಾತ ವಿಶ್ವ ವಿದ್ಯಾಲಯಗಳು ಸ್ಥಾಪಿತ ಗೊಂಡಿದ್ದು ಮತ್ತು ಅಲ್ಲಿಂದಲೆ ಅಂಧಕಾರದಲ್ಲಿದ್ದ ಅಇರೋಪ್ಯ ದೇಶಗಳಿಗೆ ಜ್ಞಾನ ಹರಡಿದ್ದು.


"ಇಜ್ತಿಹಾದ್" ನ ಪರಿಣಾಮವೇ ಇರಬೇಕು ಹಿಂದೂ ವೇದಗಳನ್ನು ಮುಘಲ್ ಚಕ್ರವರ್ತಿ  ಷಾಜಹಾನನ ಮಗ "ದಾರಾ ಶಿಕೋ" ಸಂಸ್ಕೃತದಿಂದ ಪರ್ಷಿಯನ್ ಭಾಷೆಗೆ ಭಾಷಾಂತರಿಸಿ ವಿಶ್ವಕ್ಕೆ ಪರಿಚಯಿಸಿದ್ದು. ಆಗಲೇ ವೇದಗಳ ಸೊಗಸು ವಿಶ್ವಕ್ಕೆ ತಿಳಿದಿದ್ದು, ಅದರ ಕಂಪು ಪಸರಿದ್ದು.   


"ತಹಜ್ಜುದ್: ಎಂದರೆ ಏಕಾಂತದ ಆರಾಧನೆ: ಗಾಢ ನಿದ್ದೆಯಿಂದ ರಾತ್ರಿ ಎಚ್ಚರವಾದರೆ ಕೂಡಲೇ ಎದ್ದು ನಮಾಜ್ ಮಾಡಬೇಕೆಂದು ನಿಯಮವಿದೆ. ಆ ನಮಾಜ್ ಕಡ್ಡಾಯವಲ್ಲ,  ಆದರೆ ಬಹಳಷ್ಟು ಜನ ಈ ತಹಜ್ಜುದ್ ನಮಾಜ್ ಮಾಡುತ್ತಾರೆ. ಏಕೆಂದರೆ ನೀರವ ರಾತ್ರಿಯಲ್ಲಿ ವಿಶ್ವ ಗಾಢ ನಿದ್ದೆಯಲ್ಲಿರುವಾಗ ತನ್ನನ್ನು ಸೃಷ್ಟಿಸಿದ ಪ್ರಭುವನ್ನು ನೆನಸಿ ಸಾಷ್ಟಾಂಗ ಮಾಡಿದರೆ ಅವನು ದೇವರಿಗೆ ತೀರಾ ಹತ್ತಿರದವನಾಗುತ್ತಾನೆ ಎನ್ನುವ ನಂಬಿಕೆಯಿಂದ.  


ಈಗ ನನ್ನ ಈ ಬರಹವನ್ನ ಅತ್ಯಂತ  ಸಂಯಮದಿಂದ ಯಾವುದೇ ಆವೇಶಕ್ಕೆ ಒಳಗಾಗದೆ ನೀವು ಓದುತ್ತಿದ್ದರೆ ನೀವು ಜಿಹಾದ್ ಮಾಡುತ್ತಿದ್ದೀರಿ ಎಂದರ್ಥ. ಅಂದರೆ ಕಾತುರತೆಯನ್ನು ಹತ್ತಿಕ್ಕಿ ಶಾಂತರಾಗಿ ಸಂಯಮದಿಂದ ಮುಂದೆ ಬರೆದಿದ್ದನ್ನು ಓದುವ, ನೀವು ಮಾಡುವ ಯತ್ನ ಅಥವಾ ಪರಿಶ್ರಮ, ಇದೇ ನಿಜವಾದ ಜಿಹಾದ್ ನ ಅರ್ಥ.  


ಈ ಮೇಲಿನ ವಿಶ್ಲೇಷಣೆ ನೋಡಿದಾಗ ಜಿಹಾದ್ ಪದಕ್ಕೂ ಹಿಂಸೆ, ಭಯೋತ್ಪಾದನೆಗೂ ಯಾವುದೇ ರೀತಿಯ ಸಂಬಂಧವಿಲ್ಲ ಎಂದು ನಮಗೆ ತಿಳಿಯುತ್ತದೆ. "ಜುಹ್ದ್" ಒಬ್ಬ ವ್ಯಕ್ತಿ ತನ್ನ ವ್ಯಕ್ತಿತ್ವವನ್ನೂ ಕೌಶಲ್ಯವನ್ನೂ, ಉತ್ತಮ ಪಡಿಸಿ ಕೊಳ್ಳಲು ಮಾಡುವ ಪ್ರಾಮಾಣಿಕ ಯತ್ನ, "ಇಜ್ತಿಹಾದ್" ಎಂದರೆ ಆ ಪ್ರಾಮಾಣಿಕ ಯತ್ನದ ಕಡೆ ಜ್ಞಾನದ ಸಹಾಯ ಪಡೆಯುವುದು ಮತ್ತು ತನ್ನ ಪರಿಶ್ರಮ ಮತ್ತು ಜ್ಞಾನಾರ್ಜನೆಯ ಅನ್ವೇಷಣೆಯಲ್ಲಿ ತನ್ನನ್ನು ಸೃಷ್ಟಿಸಿದ ತನ್ನ ಭಗವಂತನ ಸಹಾಯ ಯಾಚಿಸುವುದು ಏಕಾಂತದ ಆರಾಧನೆಯಾದ " ತಹಜ್ಜುದ್" ಮೂಲಕ. ಹಾಗಾದರೆ ಯುದ್ಧಕ್ಕೆ, ಹೋರಾಟಕ್ಕೆ ಅರಬ್ಬೀ  ಏನೆಂದು ಕರೆಯುತ್ತಾರೆ?   


ಜಿಹಾದ್ ಎಂದರೆ ಯುದ್ಧ ಹಿಂಸೆ ಮಾತ್ರ ಅಲ್ಲ ಎಂದಾದರೆ ಯುದ್ಧ ಮತ್ತು ಈ ತೆರನಾದ ಸ್ವರಕ್ಷಣೆಯ ಹೋರಾಟಕ್ಕೆ "ಹರ್ಬ್" ಮತ್ತು "ಕತ್ಲ್" ಎಂತಲೂ ಕರೆಯತ್ತಾರೆ. "ಹರ್ಬ್" ಎಂದರೆ ಯುದ್ಧ. "ಕತ್ಲ್" ಎಂದರೆ ಕೊಲೆ ಎಂದು. (ಹಿಂದೀ ಮತ್ತು ಉರ್ದು ಭಾಷೆಯಲ್ಲಿ ಕೂಡಾ ಕತ್ಲ್ ಅಂದರೆ ಕೊಲೆ ಎಂದೂ, ಕಾತಿಲ್ ಎಂದರೆ ಕೊಲೆಗಾರ ಎಂದೂ ಕರೆಯುತ್ತಾರೆ).


ಹಾಗಾದರೆ ಮಾಧ್ಯಮಗಳು ಮತ್ತು ಇಸ್ಲಾಂ ಟೀಕಾಕಾರ ರಿಗೆ ಈ ವಿವರಣೆ ಆಗಲಿ, ಅರಬ್ಬೀ ವ್ಯಾಕರಣದ ಈ ಅಂಶಗಳಾಗಲಿ ತಿಳಿದಿಲ್ಲ ಎಂದಲ್ಲ. ಇಸ್ಲಾಮನ್ನು ದೂಷಿಸುವ ಪರಿಪಾಠ ಇಂದು ನಿನ್ನೆಯದಲ್ಲ. ಕ್ರೈಸ್ತರ ಮೊದಲ ಧರ್ಮ ಯುದ್ಧ ದ (crusade) ನಂತರ ಮತ್ತು ಎರಡನೇ ಧರ್ಮ ಯುದ್ಧದಲ್ಲಿ ಇಂಗ್ಲೆಂಡಿನ ರಾಜ richard the lion heart ಮುಸ್ಲಿಮರ ವಿರುದ್ಧ ನಡೆದ ಜೆರುಸಲೆಂ ಕದನದಲ್ಲಿ ಸೋತ ನಂತರ ಆರಂಭಗೊಂಡ ಈ witch hunting and slandering campaign ನಿರಂತರವಾಗಿ ನಡೆದುಕೊಂಡು ಬಂದು ಸೆಪ್ಟಂಬರ್ ಧಾಳಿಯ ನಂತರ ಆಧುನಿಕ ರೂಪ ಪಡೆದುಕೊಂಡಿತು.  


ಜಿಹಾದ್ ಅಂದರೆ ಯುದ್ಧ ಅಲ್ಲ ಎಂತಲೋ? ಸ್ವರಕ್ಷಣೆಗೆ ರಾಷ್ಟ್ರಗಳು ಯುದ್ಧ ಸಾರಿವೆ, ಅವನ್ನು ಜಿಹಾದ್ ಎಂದೂ ಕರೆಯಲಾಗಿದೆ. ಆದರೆ ಕಂದಹಾರದ, ಪಾಕಿಸ್ತಾನದ ಗುಡ್ಡ ಗಾಡಿನಲ್ಲಿ ಅವಿತುಕೊಂಡು ನಮ್ಮ ಮೇಲೆ ಮತ್ತು ಅಲ್ಲಿನ ಮುಗ್ಧ ಜನರ ಮೇಲೆ ಆಕ್ರಮಣ ನಡೆಸಿ ರಕ್ತ ಪಾತ ಎಸಗುವ ಮತಾಂಧರು ಜಿಹಾದ್ ಅಲ್ಲ ಮಾಡುತ್ತಿರುವುದು. ಧರ್ಮದ್ರೋಹದ, ಅಮಾನವೀಯ ಕೃತ್ಯ.


ಇಸ್ಲಾಮೀ ರಾಜಕೀಯ ಶಾಸ್ತ್ರದಲ್ಲಿ ಎರಡು ರೀತಿಯ ರಾಷ್ಟ್ರ ಸಮೂಹಗಳ ಉಲ್ಲೇಖವಿದೆ. ಒಂದು, "ದಾರುಲ್ ಹರ್ಬ್", ಮತ್ತೊಂದು "ದಾರುಲ್ ಇಸ್ಲಾಮ್". ದಾರುಲ್ ಹರ್ಬ್ ಎಂದರೆ ಶತ್ರು ರಾಷ್ಟ್ರ. ಕಾರಣವಿಲ್ಲದೆ ಕಾಲು ಕೆರೆದು ಜಗಳಕ್ಕೆ ನಿಲ್ಲುವ ಪಾಕಿಸ್ತಾನ ಮತ್ತು ಚೀನಾ ದೇಶಗಳಂತೆ. ಇಂಥ ರಾಷ್ಟ್ರಗಳು ದಾರುಲ್ ಹರ್ಬ್ ವ್ಯಾಖ್ಯಾನಕ್ಕೆ ಬರುತ್ತವೆ. ದಾರುಲ್ ಇಸ್ಲಾಂ ಎಂದರೆ ಮುಸ್ಲಿಂ ರಾಷ್ಟ್ರ. ಮುಸ್ಲಿಂ ರಾಷ್ಟ್ರ ಮಾತ್ರವಲ್ಲ ಇಸ್ಲಾಮನ್ನು ಗೌರವಿಸಿ, ಆದರಿಸಿ ಮುಸ್ಲಿಮರ ಆರಾಧನೆಗೆ ಅನುಕೂಲ ಮಾಡಿಕೊಡುವ, ಮಸೀದಿ, ಮದ್ರಸಗಳನ್ನು ಕಟ್ಟಲು ಸಹಾಯ ಮಾಡುವ, ಸರಿಸಮನಾದ ಹಕ್ಕುಗಳನ್ನೂ ನೀಡಿ ಕಾಳಜಿ ವಹಿಸುವ ಮುಸ್ಲಿಮೇತರ ರಾಷ್ಟ್ರವೂ ದಾರುಲ್ ಇಸ್ಲಾಂ ವ್ಯಾಖ್ಯಾನದ ಅಡಿಗೆ ಬರುತ್ತದೆ. ನಮ್ಮ ಭವ್ಯ ಭಾರತ ಈ ರಾಷ್ಟ್ರದ ವ್ಯಾಖ್ಯಾನಕ್ಕೆ ಒಳಪಡುತ್ತದೆ. ಇಲ್ಲಿ ಬಹುಸಂಖ್ಯಾತ ಹಿಂದೂಗಳು ಮುಸ್ಲಿಮರನ್ನು, ಅವರ ಸಂಸ್ಕೃತಿಯನ್ನು ಆದರಿಸುವ ರೀತಿ ನೋಡಿ ಜಗತ್ತಿನ ಇತರೆ ಇಸ್ಲಾಮೀ ದೇಶಗಳು ಮೆಚ್ಚುಗೆ ವ್ಯಕ್ತಪಡಿಸಿವೆ. ಅಮೋಘ ಭಾರತೀಯ ಸಂಸ್ಕಾರವನ್ನು,  ಹೃದಯ ವೈಶಾಲ್ಯತೆಯನ್ನು ಕೊಂಡಾಡಿವೆ.  ಹೀಗಿರುವಾಗ ಈ ದೇಶದ ಮೇಲೆ ಶಸ್ತ್ರ ಪ್ರಯೋಗ ಮಾಡುವುದು, ಅಮಾಯಕರನ್ನು ಕೊಲ್ಲುವುದು ಅಕ್ಷಮ್ಯ ಅಪರಾಧ ಮಾತ್ರವಲ್ಲ ಅಂಥ ವಿದ್ರೋಹಿಗಳನ್ನು ನೇರ ಮಾಡಲು ಸಾಧ್ಯವಿಲ್ಲದಿದ್ದರೆ ನೇರವಾಗಿ ನೇಣಿಗೆ ಕಳಿಸಬೇಕಾದ್ದು ನಾಗರೀಕ ಸಮಾಜ ಮಾಡಬೇಕಾದ ಪ್ರಥಮ ಕೆಲಸ.


 ಜಿಹಾದ್ ಗೆ ಕರೆ ನೀಡುವ ಅಧಿಕಾರ ಇರುವುದು ಆಡಳಿತಾಧಿಕಾರಿ ಅಥವಾ ಸರಕಾರಕ್ಕೆ ಮಾತ್ರ. ತಲೆ ಕೆಟ್ಟ ಮತಾಂಧರು ಮಾಡುವ ಘನಂದಾರಿ ಕೆಲಸಕ್ಕೆ ಜಿಹಾದ್ ಎಂದು ಕರೆಯುವಂತಿಲ್ಲ.


ಪ್ರಪಂಚದಲ್ಲಿ ಎಲ್ಲಾ ಧರ್ಮಕ್ಕೆ ಸೇರಿದ ಜನರು ಒಂದಲ್ಲ ಒಂದು ರೀತಿಯ ಹೋರಾಟದಲ್ಲಿ ನಿರತರಾಗಿದ್ದನ್ನು ನಾವು ಕಂಡಿದ್ದೇವೆ. ಯೂರೋಪ್ ಖಂಡದಲ್ಲಿ ೬೦ ಲಕ್ಷ ಯೂಹೂದ್ಯರನ್ನು ಕೊಂದಿದ್ದು, gas chamber ಗಳಿಗೆ ಕಳಿಸಿ ನಿರ್ನಾಮ ಮಾಡಿದ್ದು "ನಾಜಿಗಳು". ನಾಜಿಗಳು ಯಾವ ಧರ್ಮೀಯರೆಂದು ಯಾರಿಗಾದರೂ ತಿಳಿದಿದೆಯೇ? ಬೋಸ್ನಿಯಾದಲ್ಲಿ ೮೦ ಸಾವಿರಕ್ಕೂ ಮುಸ್ಲಿಮರನ್ನು ಕೊಂದವರು "ಸರ್ಬಿಯನ್ನರು". ಸರ್ಬಿಯನ್ನರು ಯಾವ ಧರ್ಮೀಯರೆಂದು ಎಲ್ಲೂ ಉಲ್ಲೇಖವಿಲ್ಲ. ಶ್ರೀಲಂಕೆಯಲ್ಲಿ ಅಮಾಯಕ ತಮಿಳರ ಹಿಂಸೆ, ಕೊಲೆ ನಡೆಸಿದ್ದು "JVP" ಯವರು, JVP ಯವರು ಯಾವ ಧರ್ಮದರೆಂದು ಉಲ್ಲೇಖವಿಲ್ಲ. ಅದೇ ಶ್ರೀಲಂಕೆಯಲ್ಲಿ ೨೫ ವರ್ಷಗಳಿಗೂ ಹೆಚ್ಚು ಕಾಲ ಬೌದ್ಧರನ್ನೂ, ಅಲ್ಲಿನ ದೊಡ್ಡ ದೊಡ್ಡ ನಾಯಕರನ್ನೂ ಕೊಂದವರು "ವ್ಯಾಘ್ರರು". ವ್ಯಾಘ್ರರು ಯಾವ ಧರ್ಮೀಯರೆಂದು ಉಲ್ಲೇಖವಿಲ್ಲ. ಇತ್ತೀಚೆಗೆ ಅಮೆರಿಕೆಯಲ್ಲಿ ಅಪಾರ ಆಯುಧ ಶೇಖರಿಸಿ ದೊಡ್ಡ ರೀತಿಯ ಹಿಂಸೆಗೆ ಅಣಿಯಾಗುತ್ತಿದ್ದ ಜನರು "ಹುಟಾರಿ" ಪಂಗಡದವರು. "ಹುಟಾರಿ" ಗಳು ನಂಬಿದ ಧರ್ಮ ಯಾವುದು ಎಂದು ಯಾರಿಗೂ ತಿಳಿದಿಲ್ಲ. ಆದರೆ ಈ ಮಾನದಂಡ ಮುಸ್ಲಿಮರೆಂದು ಕರೆದುಕೊಂಡು ಧರ್ಮಕ್ಕೆ ಕಳಂಕ ತರುವ ಜನರಿಗೆ ನೀಡಲು ಮಾಧ್ಯಮ, ಕುಬುದ್ಧಿಯ ಪಂಡಿತರು ತಯಾರಿಲ್ಲ. ಸಿಕ್ಕಿ ಹಾಕಿಕೊಂಡವನ ಹೆಸರು ಮುಸ್ಲಿಂ ಆದರೆ ಸಾಕು ಟಾಮ್ ಟಾಮ್ ಶುರು; ಮುಸ್ಲಿಮ್ ಭಯೋತ್ಪಾದಕ, ಶಂಕಿತ ಮುಸ್ಲಿಂ ತೀವ್ರವಾದಿ, ಮುಸ್ಲಿಂ ಮೂಲಭೂತವಾದಿ, islamic activist, muslim radical, muslim fundamentalist.....................ಯಾವ ರೀತಿಯ ಲೇಬಲ್ಲುಗಳು ಬೇಕು ನಿಮಗೆ, ಆ ರೀತಿಯ ಲೇಬಲ್ಲುಗಳು ತಯಾರು. ಹಾಗಾದರೆ ಮೇಲೆ ನಾನು ಉದ್ಧರಿಸಿದ ಹತ್ಯಾಕಾಂಡಗಳ ಕರ್ತೃಗಳು ಯಾರು? "ಹುಟಾರಿ", "ನಾಜಿ" ಎಂದರೆ ಮಂಗಳ ಗ್ರಹದಿಂದಲೋ ಅಥವಾ ಬೇರಾವುದು ಗ್ರಹದಿಂದ ಬಂದಪ್ಪಳಿಸಿದ ಅನರ್ಥವೋ? ವ್ಯಾಘ್ರ ಅಂದರೆ ಒಂದು ರೀತಿಯ ಸೊಂಕೋ, ರೋಗವೋ? JVP ಎಂದರೆ AIDS ರೀತಿಯ ಬ್ಯಾನೆಯೋ? ಸರ್ಬಿಯನ್ ಎಂದರೆ ಪ್ರಳಯವೋ, ಜ್ವಾಲಾಮುಖಿಯೋ? ಏಕೀ ಇಬ್ಬಂದಿತನ? ಲೇಖನಿಗೆ ದ್ರೋಹ ಬಗೆಯುವ ಪರಿಪಾಠ? ಲೇಖನಿ ಹುತಾತ್ಮನ ರಕ್ತಕ್ಕಿಂತಲೂ ಪವಿತ್ರ ಅಂತಾರೆ. ಆದರೆ ಮೇಲೆ ಹೇಳಿದ ಉದಾಹರಣೆಗಳಲ್ಲಿ ಎಷ್ಟೊಂದು ಪಾವಿತ್ರ್ಯ ಅವಿತುಕೊಂಡಿದೆ ನೋಡಿ.  


ಜನರನ್ನು ಲೇಬಲ್ ಅಡಿಯಲ್ಲಿ ವ್ಯಾಖ್ಯಾನಿಸಿ ದೂರ ಮಾಡುವುದಕ್ಕಿಂತ ಒಳ್ಳೆಯ ಕೆಲಸ ಸಂವಾದದ ಪ್ರಕ್ರಿಯೆ ಶುರು ಮಾಡುವುದು. ಜನರ ಮಧ್ಯೆ ಕಂದಕ ತೋಡಲೆಂದೇ ಅವತರಿಸಿದ ಸಮೂಹವನ್ನು ನಾಗರೀಕ ಸಮಾಜ ದೂರ ಮಾಡಿ ಎಲ್ಲರೂ ಮೇಲೆ ಕೂತ ಭಗವಂತನ ಮಕ್ಕಳು, ಎಲ್ಲರಿಗೂ ಸರಿಸಮನವಾಗಿ ವಿಶಾಲವಾದ ಭೂಮಿಯನ್ನು ಹರಡಿ ತಾರತಮ್ಯ ಮಾಡದೆ ಗಾಳಿ ಬೆಳಕು ನೀರು ಒದಗಿಸುತ್ತಿರುವ ಮಹಾ ಪ್ರಭುವಿನ ಮಕ್ಕಳೆಂದು ಭಾವಿಸಿ ಬದುಕನ್ನು ಸಾಗಿಸುವುದು. ಹಕ್ಕಿಯಂತೆ ಹಾರಲು ಕಲಿತ, ಮೀನಿನನಂತೆ ಈಜಲು ಕಲಿತ ಮನುಷ್ಯ ಮನುಷ್ಯನ  ರೀತಿ ಬಾಳಲು ಕಲಿಯುವುದನ್ನು ಕಲಿಯುವುದು ಅತ್ಯವಶ್ಯಕ. man would do well to "relearn" how to live like a man.   

ಲೇಖನ ವರ್ಗ (Category): 

ಪ್ರತಿಕ್ರಿಯೆಗಳು

<<ಹಕ್ಕಿಯಂತೆ ಹಾರಲು ಕಲಿತ, ಮೀನಿನನಂತೆ ಈಜಲು ಕಲಿತ ಮನುಷ್ಯ ಮನುಷ್ಯನ ರೀತಿ ಬಾಳಲು ಕಲಿಯುವುದನ್ನು ಕಲಿಯುವುದು ಅತ್ಯವಶ್ಯಕ. man would do well to "relearn" how to live like a man.>> ನಿಮ್ಮ ಈ ಸದಾಶಯಕ್ಕೆ ನಮ್ಮ ಪ್ರಾರ್ಥನೆಯೂ ಸೇರಿದೆ. ಶಾಮಲ

ಅಬ್ದುಲ್, ನೀವು ಬರೆದಿದ್ದು ಚೆನ್ನಾಗಿದೆ. ಆದರೆ ಒಂದೇ ಒಂದು ತಪ್ಪಿದೆ. ನೀವು ಬಹುತೇಕರು ’ಮುಗ್ಧ’ ಮುಸ್ಲಿಮರೆಂದೂ ರೋಟಿ ಕಪ್‍ಡ ಗೆ ದುಡಿಯುವವರೆಂದೂ ಹೇಳಿದ್ದೀರಿ. ಕೇವಲ ಲಕ್ಷದಷ್ಟು ಜನ ಮಾತ್ರ ಈಗಿನ ಹಿಂಸೆಗೆ ಪ್ರಚೋದಿಸುವವರು ಎಂದು ಹೇಳಿದ್ದೀರಿ. ಇದು ಸರಿಯಲ್ಲ ಅನಿಸುತ್ತದೆ ನನಗೆ. ಉಳಿದ ಇಸ್ಲಾಮಿಕ್ ದೇಶಗಳ ಬಗ್ಗೆ ಗೊತ್ತಿಲ್ಲ, ಆದರೆ ಪಾಕಿಸ್ಥಾನ್ ಮತ್ತು ಬಾಂಗ್ಲಾಗಳಲ್ಲಿ ಪ್ರತಿಶತ ಕನಿಷ್ಟ ೫೦ ರಷ್ಟು ಹಿಂಸ್ರ ಮುಸ್ಲಿರು ಇರಬಹುದು ಅನಿಸುತ್ತದೆ. ಯಾಕೆಂದರೆ ಉಳಿದ ಮುಗ್ಧ ಮುಸ್ಲಿಮರ ಬೇಳೆ ಅಲ್ಲಿ ಬೇಯುತ್ತಿಲ್ಲ. ಮೊನ್ನೆ ತಾನೆ ಮಸೀದಿಯೊಂದರ ಮೇಲೆ ದುರುಳರು ಧಾಳಿ ಮಾಡಿದ್ದು ನೀವು ಕೇಳಿರಬಹುದು. ಅಂದರೆ ಅಲ್ಲಿನ ಮುಗ್ಧ ಮುಸ್ಲಿಮರಿಗೆ ತಮ್ಮನ್ನು ತಾವು ಕಾಪಾಡಿಕೊಳ್ಳಲು ಆಗುತ್ತಿಲ್ಲ. ನೀವು ಲೇಖನದಲ್ಲಿ ಹೇಳಿದ ರೀತಿಯಲ್ಲಿ ಬದುಕುವ ಮುಸ್ಲಿಮರಿಗಿಂತ ದುರುಳ ಮುಸ್ಲಿಮರೇ ಅಲ್ಲಿ ಮೇಲುಗೈ ಸಾಧಿಸಿದ್ದಾರೆಂದು ತಿಳಿಯುತ್ತದೆ. << ಹಾಗಾದರೆ ಮಾಧ್ಯಮಗಳು ಮತ್ತು ಇಸ್ಲಾಂ ಟೀಕಾಕಾರ ರಿಗೆ ಈ ವಿವರಣೆ ಆಗಲಿ, ಅರಬ್ಬೀ ವ್ಯಾಕರಣದ ಈ ಅಂಶಗಳಾಗಲಿ ತಿಳಿದಿಲ್ಲ ಎಂದಲ್ಲ. ಇಸ್ಲಾಮನ್ನು ದೂಷಿಸುವ ಪರಿಪಾಠ ಇಂದು ನಿನ್ನೆಯದಲ್ಲ. >> ಹಾಗಾಗಿ ಇಂತಹ ದುರುಳ ಮುಸ್ಲಿಮರ ಅಟ್ಟಹಾಸ ನೋಡಿ ಪ್ರಪಂಚ ಅದನ್ನೇ ಇಸ್ಲಾಮ್ ಎಂದು ತಿಳಿದಿದ್ದರಲ್ಲಿ ತಪ್ಪೇನಿದೆ? ಇದು ಇತರರು ಮಾಡುವ ದೂಷಣೆಗಿಂತಲೂ ಮುಸ್ಲಿಮರಲ್ಲೇ ಬಹುತೇಕರು ಒಂದೋ ಅದರ ತತ್ವಗಳಿಂದ ದೂರ ಹೋಗಿದ್ದಾರೆ ಅಥವಾ ತತ್ವಗಳಿಂದ ದೂರ ಹೋದವರೇ ಇಸ್ಲಾಮ್ ಅನ್ನು ಕಲಿಸುವ ದುಸ್ಥಿತಿ ಉಂಟಾಗಿದೆ. ಒಂದು ಪ್ರಶ್ನೆ - ಕೇರಳದಲ್ಲಿ ಮೊನ್ನೆ ನಡೆದ ಅಮಾನುಷ ಕ್ರಿಯೆಯನ್ನು ಹಿಂದುವೊಬ್ಬ ಮಾಡಿದ್ದರೆ ಹಿಂದುಗಳಿಂದಲೇ ತೀವ್ರ ಪ್ರತಿರೋಧ ಎದುರಾಗುತ್ತಿತ್ತು. ಸೋ ಕಾಲ್ಡ್ ಹಿಂದೂ ಮತಾಂಧರೂ ಅಂತಹ ಕೆಲಸವನ್ನು ಖಂಡಿಸುತ್ತಿದ್ದವು. ಆದರೆ ನಿಮ್ಮಲ್ಲಿ ಇಸ್ಲಾಮಿಕ್ ಕೋರ್ಟೇ ಅಂತಹ ಕಾನೂನು ಬಾಹಿರ ತೀರ್ಪು ಕೊಟ್ಟದ್ದು ಮಾತ್ರವಲ್ಲದೆ ಅಂತಹ ಕೃತ್ಯವನ್ನು ಖಂಡಿಸುವ ಯಾವುದೇ ಮಾತು ಕೇಳಿಬರುತ್ತಿಲ್ಲ. ಇದರ ಅರ್ಥ ಏನು? ನೀವು ಬರೆದಿದ್ದಕ್ಕೂ ಇದಕ್ಕೂ ಎಲ್ಲಿಯ ಹೋಲಿಕೆ?

ಅಬ್ದುಲ್, ನಿಮ್ಮ ಲೇಖನದ ಆಶಯ ಒಳ್ಳೆಯದೇ - ಎಲ್ಲ ವಿಷಯಗಳ ಅರ್ಥ ಸರಿಯಾಗಿ ವಿವರಿಸುವುದು. ಇದರಿಂದ ಸಂಪದಿಗರಿಗೆ ಹೆಚ್ಚಿನ ಅರಿವು ಖಂಡಿತ ಮೂಡುತ್ತದೆ. ಆದರೆ ಜನ ನಂಬುವುದು ನೋಡಿದುದನ್ನು ಮಾತ್ರ. ಇವತ್ತಿನ ದಿನ ಬರಿಯ ಒಂದು ಗುಂಪು ಮಾತ್ರ ಅಥವಾ ಬರಿಯ ಮಾಧ್ಯಮ ಮಾತ್ರ "ಜಿಹಾದ್" ಮುಂತಾದುವನ್ನು ತಪ್ಪಾಗಿ ಬಿಂಬಿಸುತ್ತಿದೆ ಎನ್ನುವುದು ನಂಬಲಾರದ ಮಾತು. ತಾವು ಕಟ್ಟಾ ಇಸ್ಲಾಮೀಯರು ಎಂದು ಕೊಳ್ಳುವವರೆ ಈ ಪದಗಳ ಅರ್ಥವನ್ನು ಹಾಳು ಮಾಡಿರುವವರು. ಆದರೆ ಅವರ ಸಂಖ್ಯೆ ನೀವಂದುಕೊಂಡಷ್ಟು ಕಡಿಮೆ ಖಂಡಿತ ಇಲ್ಲ. ಹಾಗೆ ಇದ್ದಿದ್ದರೆ ಇವತ್ತು ಸಣ್ಣ ಸಣ್ನ ಊರುಗಳಲ್ಲೂ ಕೂಡ ಇಸ್ಲಾಮಿ ಉಗ್ರಗಾಮಿ ಸಂಘಟನೆಗಳ ಶಾಖೆಗಳು ಇರುತ್ತಿರಲಿಲ್ಲ. ತಲೆಕೆಟ್ಟ ಮತಾಂಧರು ತಾವು ಮಾಡುತ್ತಿರುವ ಕೆಲಸಕ್ಕೆ ಜಿಹಾದ್ ಎಂದು ಕರೆಯುತ್ತಿದ್ದರೂ ಹೆಚ್ಚಿನ ಇಸ್ಲಾಮೀಯರು ಅದನ್ನು ಸಾರ್ವಜನಿಕವಾಗಿ ಖಂಡಿಸದಿರುವುದೇ ಪರರು ಜಿಹಾದ್ ಅನ್ನು ತಪ್ಪಾಗಿ ಅರ್ಥೈಸಿರುವುದರ ಕಾರಣ

ಜಿಹಾದ್ ಅಲ್ಲಾನನ್ನು ನಂಬದ ಜನರನ್ನು ನಾಶ ಮಾಡಲು ಮಾಡುವ ಯುದ್ಧ ಎಂದು ಎಲ್ಲೋ ಓದಿದ ನೆನಪು. ಇಸ್ಲಾಂ ಸಂಸ್ಕೃತಿ ಬಗ್ಗೆ ಉತ್ತಮ ಮಾಹಿತಿ ಕೊಟ್ಟಿದ್ದೀರ.

[[[೧೭೦ ಕೋಟಿ ಮುಸ್ಲಿಮ್ ಜನಸಂಖ್ಯೆಯಿರುವ ಪ್ರಪಂಚದಲ್ಲಿ ಈ ತೆರನಾದ ನಿರರ್ಥಕ ಹಿಂಸೆಯಲ್ಲಿ ತೊಡಗಿಸಿಕೊಂಡವರು ಕೆಲವೇ ಲಕ್ಷಗಳಷ್ಟು ದುರುಳರು, ಧರ್ಮ ದ್ರೋಹಿಗಳು]]] ಆದರೆ ಇವರ ಪ್ರಭಾವ ಎಷ್ಟಿದೆಯೆಂದರೆ ಎಲ್ಲಾ ಮುಸ್ಲಿಮರನ್ನು ಅನುಮಾನದಿಂದ ನೋಡುವಷ್ಟು! ಮುಸ್ಲಿಮರ ಕುರಿತು ಉಳಿದವರ ಅಬಿಪ್ರಾಯ ಬದಲಿಸುವ ಕೆಲಸ ಮುಸ್ಲಿಮರೇ ಮಾಡಬೇಕಿದೆ, ನಂಬಿಕೆ ಬರುವಂತೆ ನಡೆದುಕೊಳ್ಲಬೇಕಿದೆ.

ಇದನ್ನು ಓದಿ .. http://thatskannada.... ಕರಾಚಿ, ಜು. 9 : ಅಲ್ಪಸಂಖ್ಯಾತರಾಗಿರುವ ಹಿಂದೂಗಳ ಮೇಲೆ ಪಾಕಿಸ್ತಾನೀಯರು ಯಾವ ರೀತಿ ಅಮಾನವೀಯವಾಗಿ ದೌರ್ಜನ್ಯ ನಡೆಸುತ್ತಿದ್ದಾರೆನ್ನುವುದಕ್ಕೆ ಇಲ್ಲೊಂದು ಉದಾಹರಣೆ. ಕರಾಚಿ ನಗರದ ಮೆಮನ್ ಗೋತಾ ಪ್ರದೇಶದಲ್ಲಿರುವ ಮಸೀದಿ [^] ಬಳಿ ಹಿಂದೂ ಬಾಲಕನೊಬ್ಬ ನೀರು ಕುಡಿದ ತಪ್ಪಿಗೆ ಆ ಪ್ರದೇಶದಲ್ಲಿದ್ದ ಸುಮಾರು 60 ಕುಟುಂಬವನ್ನು ಅಮಾನವೀಯವಾಗಿ ಎಳೆದು ದನದ ಕೊಟ್ಟಿಗೆಯಲ್ಲಿ ಕೂಡಿ ಹಾಕಿ ಮನಬಂದಂತೆ ಥಳಿಸಿದ ಘಟನೆ ನಡೆದಿದೆ ಎಂದು ಸ್ಥಳೀಯ ಪತ್ರಿಕೆ 'ದಿ ನ್ಯೂಸ್' ವರದಿ ಮಾಡಿದೆ. ಸ್ಥಳೀಯ ಪ್ರಭಾವಿ ಬುಡಕಟ್ಟು ಜನಾಂಗದ ನಾಯಕ ಈ ಎಲ್ಲಾ ಕುಟುಂಬದವರನ್ನು ದನದ ಕೊಟ್ಟಿಗೆಯಲ್ಲಿಯೇ ನೆಲೆಸುವಂತೆ ಬೆದರಿಕೆ ಹಾಕಿದ್ದಾನೆ. ಮಸೀದಿ ಬಳಿ ನನ್ನ ಮಗ ನೀರು ಕುಡಿಯುತ್ತಿದ್ದನ್ನು ನೋಡಿದ ಸ್ಥಳೀಯ ಬುಡಕಟ್ಟು ಜನಾಂಗದವರು ಹುಡುಗನ ಮೇಲೆ ಹಲ್ಲೆ ನಡೆಸಿದ್ದಾರೆ. ಸುಮಾರು 150 ಜನ ಸೇರಿ ಇಲ್ಲಿ ವಾಸವಾಗಿರುವ ಹಿಂದೂ ಕುಟುಂಬದವರನ್ನು ಹೊರಗೆಳೆದು ಹಲ್ಲೆ ನಡೆಸಿದ್ದಾರೆ. ತೀವ್ರವಾಗಿ ಗಾಯಗೊಂಡ 7 ಜನರನ್ನು ಜಿನ್ನಾ ಆಸ್ಪತ್ರೆಗೆ ದಾಖಲಿಸಿದ್ದೇವೆ ಎಂದು ಹುಡುಗನ ತಂದೆ ದಿನೇಶ್ ಸ್ಥಳೀಯ ಪತ್ರಿಕೆಗೆ ತನ್ನ ನೋವು ತೋಡಿ ಕೊಂಡಿದ್ದಾನೆ. ಈ ಪ್ರದೇಶದ ಮತ್ತೊಂದು ಭಾಗದಲ್ಲಿರುವ ಸುಮಾರು 400 ಕುಟುಂಬಗಳಿಗೂ ಜೀವ ಬೆದರಿಕೆ ಇದೆ. ದನದ ಕೊಟ್ಟಿಗೆಯಲ್ಲಿ ನೆಲೆಸುವಂತೆ ನಮಗೆ ಆಜ್ಞಾಪಿಸಿದ್ದಾರೆ. ಮಹಿಳೆಯರಿಗಂತೂ ರಕ್ಷಣೆಯೇ ಇಲ್ಲ. ಎಲ್ಲಿ ಜೀವಕ್ಕೆ ಅಪಾಯ ಮಾಡುತ್ತಾರೋ ಎಂದು ಮನೆಯಿಂದ ಹೊರ ಬರಲು ಭಯವಾಗುತ್ತಿದೆ. ಇಲ್ಲಿ ನಡೆಯುತ್ತಿರುವ ಎಲ್ಲಾ ಘಟನೆ ಸ್ಥಳೀಯ ಪೊಲೀಸರಿಗೆ ತಿಳಿದಿದೆ. ಆದರೆ ಅವರು ಇದುವರೆಗೆ ನಮ್ಮ ರಕ್ಷಣೆಗೆ ಬಂದಿಲ್ಲ ಎಂದು ನೊಂದ ಹೀರಾ ಎನ್ನುವ ವ್ಯಕ್ತಿ ಹೇಳಿಕೆ ನೀಡಿದ್ದಾನೆ. ಇಲ್ಲಿ ನಡೆಯುತ್ತಿರುವ ಘಟನೆಗೆ ಮತ್ತು ಹಿಂದೂಗಳ ಫಿರ್ಯಾದಿಗೆ ಸ್ಪಂದಿಸಿರುವ ಅಲ್ಪಸಂಖ್ಯಾತ ಖಾತೆ ಸಚಿವ ಮೋಹನ್ ಲಾಲ್ ಸೂಕ್ತ ರಕ್ಷಣೆ ನೀಡುವ ಭರವಸೆ ನೀಡಿದ್ದಾರೆ. ಪೊಲೀಸರಿಗೆ ರಕ್ಷಣೆ ನೀಡುವಂತೆ ಆದೇಶ ನೀಡಲಾಗಿದೆ ಎಂದು ಹೇಳಿಕೆ ನೀಡಿದ್ದಾರೆ.

<<ಜನರನ್ನು ಲೇಬಲ್ ಅಡಿಯಲ್ಲಿ ವ್ಯಾಖ್ಯಾನಿಸಿ ದೂರ ಮಾಡುವುದಕ್ಕಿಂತ ಒಳ್ಳೆಯ ಕೆಲಸ ಸಂವಾದದ ಪ್ರಕ್ರಿಯೆ ಶುರು ಮಾಡುವುದು. ಜನರ ಮಧ್ಯೆ ಕಂದಕ ತೋಡಲೆಂದೇ ಅವತರಿಸಿದ ಸಮೂಹವನ್ನು ನಾಗರೀಕ ಸಮಾಜ ದೂರ ಮಾಡಿ ಎಲ್ಲರೂ ಮೇಲೆ ಕೂತ ಭಗವಂತನ ಮಕ್ಕಳು, ಎಲ್ಲರಿಗೂ ಸರಿಸಮನವಾಗಿ ವಿಶಾಲವಾದ ಭೂಮಿಯನ್ನು ಹರಡಿ ತಾರತಮ್ಯ ಮಾಡದೆ ಗಾಳಿ ಬೆಳಕು ನೀರು ಒದಗಿಸುತ್ತಿರುವ ಮಹಾ ಪ್ರಭುವಿನ ಮಕ್ಕಳೆಂದು ಭಾವಿಸಿ ಬದುಕನ್ನು ಸಾಗಿಸುವುದು. ಹಕ್ಕಿಯಂತೆ ಹಾರಲು ಕಲಿತ, ಮೀನಿನನಂತೆ ಈಜಲು ಕಲಿತ ಮನುಷ್ಯ ಮನುಷ್ಯನ ರೀತಿ ಬಾಳಲು ಕಲಿಯುವುದನ್ನು ಕಲಿಯುವುದು ಅತ್ಯವಶ್ಯಕ. man would do well to "relearn" how to live like a man.>> ಈ ಮಾತುಗಳಿಗೆ ನನ್ನ ಸಹಮತ ಇದೆ. - ಆಸು ಹೆಗ್ಡೆ

<<ಕೇರಳದಲ್ಲಿ ಮೊನ್ನೆ ನಡೆದ ಅಮಾನುಷ ಕ್ರಿಯೆ>> ಈ ಘಟನೆಯನ್ನು ಖಂಡಿಸೊ ಕನಿಷ್ಟ ಸೌಜನ್ಯ ನಿಮ್ಮವರ್ಯಾರು ತೋರಲಿಲ್ಲ. ನೀವು ಹಿಂದುಗಳು ಹೀಗೆ ಆ ಪಾಶ್ಚ್ಯಾತ್ಯರು ಹಾಗೆ ಅಂತ ದೂರುವವರು ನಿಮ್ಮವರೆ ಮಾಡಿದ ಈ ಕ್ರೌರ್ಯಕ್ಕೆ ನಿರಾಕರಣೆ ಇಲ್ಲವೆ? ಭುಹುಷಃ ಉತ್ತರಿಸಲಿಕ್ಕೆ ಸಮಯವಿಲ್ಲದಿರಬಹುದೇನೋ? ಬಾಂಬೆ ದಾಳಿ ನಂತರ ನಿಮ್ಮವ ಜಾವೆದ್ ಅಖ್ತರ್,ಇನ್ನೂ ಹಲವರು ದೊಡ್ಡ ಪಡೆಗಳೂಂದಿಗೆ ರಸ್ತೆಗಿಳಿದಿದ್ದರು.. ಅಲ್ಪಸಂಖ್ಯಾತರ ರಕ್ಷಣೆಗೆಂದು...ಈಗ ಚುಪ್ ಏಕೆ.? ಬಹುಷಃ ಇದು ಸರಿನೆನೋ?ಅಥವಾ ಧ್ವನಿ ಎತ್ತಲಿಕ್ಕೆ ಭಯವೇನೂ?ಫತ್ವ ಜಾರಿಯಾಗುತ್ತೆಂದು... ಬೇರೆಯವರು ಖಂಡಿಸಿದರೆ ಅದು ಅಲ್ಪಸಂಖ್ಯಾತರ ಸ್ವಾತಂತ್ರ್ಯ ಚ್ಯುತಿ. ಈ ರೀತಿ ಮತಾಂಧ ಕ್ರೌರ್ಯದ ವಿರುದ್ಧ ನೀವು ಧ್ವನಿ ಎತ್ತುತ್ತಾ ಹೋಗಿದ್ದಲ್ಲಿ ಇಷ್ಟೊತ್ತಿಗಾಗಲೇ ಇಂತವು ಎಷ್ಟೋ ಕಡಿಮೆಯಾಗಿರುತ್ತಿತ್ತು.ಸಾಮರಸ್ಯ ಎಂದೋ ಬಂದಿರುತಿತ್ತು.ಮೌನಂ ಸಮ್ಮತಿ ಲಕ್ಷಣಂ .ಅಷ್ಟೇ ಸಾಕು ಇಂತವರಿಗೆ...ಮತ್ತೆ ಮತ್ತೆ ಇವೇ...:( <<<ಮುಸ್ಲಿಮರ ಕುರಿತು ಉಳಿದವರ ಅಬಿಪ್ರಾಯ ಬದಲಿಸುವ ಕೆಲಸ ಮುಸ್ಲಿಮರೇ ಮಾಡಬೇಕಿದೆ, ನಂಬಿಕೆ ಬರುವಂತೆ ನಡೆದುಕೊಳ್ಳಬೇಕಿದೆ>>>. ಈ ಮಾತು ಕಟು ಸತ್ಯ ....ಕೇವಲ ಒಂದಷ್ಟು ಲೇಖನ ಏನೂ ಮಾಡದು. ನಮ್ಮವರನ್ನು ನಾವು ತಿದ್ದುತೀವಿ ನಿಮ್ಮವರನ್ನು ನೀವು ತಿದ್ದಿ...ಮುಂದೆ ಎಂದಾದರು ವಿಶ್ವಮಾನವ ಅನ್ನೋ ಕನಸು ನನಸಾಗಲಿ... --ಮನು

ಅಬ್ದುಲ್., >>>ಜಿಹಾದ್ ಪದದ ಮೂಲ "ಜಹ್ದ್" ಎನ್ನುವ ಪದದಿಂದ. ಅದರ ಅರ್ಥ ಶ್ರಮ ವಹಿಸುವುದು. ಒಬ್ಬ ದುಶ್ಚಟ ಬಿಡಲು, ಕುಡಿತ ಬಿಡಲು , ಜೂಜಾಟ ಬಿಡಲು ಪರಿಶ್ರಮಿಸುವ ಹಾಗೆಯೇ ಜಿಹಾದ್ ಎನ್ನುವುದು ಸಹ ಒಳ್ಳೆಯ ನಡತೆಗೆ ಒಬ್ಬ ಮಾಡುವ ಪರಿಶ್ರಮ. .<<< ನಾನು ಕೇಳಿದಂತೆ, ಜಿಹಾದ್ ಎಂದರೆ ಧರ್ಮ ಯುದ್ಧ. ನಾನು, ನನ್ನದು, ನನ್ನ ಧರ್ಮವೇ ಶ್ರೇಷ್ಠ ಎನ್ನುವಂತಹ ಕಲ್ಪನೆಯನ್ನಿಟ್ಟುಕೊಂಡು ಉಳಿದವನ್ನು ನಾಶಮಾಡುವ ಹುನ್ನಾರ ನಡೆಸುವಂತಹ ಯುದ್ಧ. ನೀವು ಉಲ್ಲೇಖಿಸುವಂತೆ ಜಿಹಾದ್ ಕೇವಲ ಶ್ರಮ ವಹಿಸುವುದು ಎಂಬುದು ನಿಮ್ಮ ಮನೋಭಾವನೆಯಲ್ಲಿನ ಸಂಕುಚಿತ ಅರ್ಥ. ಈ ಪದಕ್ಕೆ ನಿಮ್ಮ ಅರ್ಥದಿಂದಾಚೆಗೂ ಒಂದು ಅರ್ಥ ಹಾಗೂ ಕಾರ್ಯದ ಎಲ್ಲೆ ಇದೆ. ಜಿಹಾದ್ ಎಂಬುದು ನೀವು ಹೇಳಿದ ಅರ್ಥದಲ್ಲಿಯೇ ಇದ್ದಿದ್ದರೆ ಸಾವಿರಾರು ಹಿಂದೂಗಳು ಬಲಿಪಶುಗಳಾಗುತ್ತಿದ್ದರಾ? ಕೇವಲ ಭಾರತದಲ್ಲಿ ಮಾತ್ರವಲ್ಲ ಉಳಿದ ಮುಸ್ಲಿಂ ರಾಷ್ಟ್ರಗಳಲ್ಲೂ ಸಹ ಸಾಮಾನ್ಯ ಜನರು ಜೀವ ಭಯದಿಂದ ಬದುಕುತ್ತಿದ್ದಾರೆ?. ನಿಮ್ಮ ಲೇಖನ ವಾಸ್ತವದಲ್ಲಿನ ಸಮಸ್ಯೆಗೆ ಪರಿಹಾರ ನೀಡುವ ಬದಲು ಪರಿಕಲ್ಪನೆಗೆ ಹೊಸ ಆಯಾಮವನ್ನು ನೀಡುವ ಮತ್ತೊಂದು ಪ್ರಯತ್ನವಾಗಿದೆ ಅಷ್ಟೆ. ನಾಗಶಿಲ್ಪ http://cslcku.wordpr...