ಬ್ಲಾಗೆಂಬ ಹುಟ್ಟಿಯಲ್ಲಿನ ಅಸಂಖ್ಯ ಬರಹಗಳ ಮೇಲೆ ಕಣ್ಣಾಡಿಸುವಾಗ ಮನಸ್ಸಲ್ಲಿ ಮಿಂಚಿ ಮರೆಯಾದ ವಿಚಾರ ಒಂದು ಪ್ರಶ್ನೆಯಾಗಿ ಕಾಡಲಾರಂಭಿಸಿದೆ.

ಪ್ರವಾಸ ಕಥನಗಳು ಎಂದರೆ ಏನು? ಇಷ್ಟು ಘಂಟೆಗೆ ಬಸ್ಸು ಹತ್ತಿ ಇಂತಲ್ಲಿ ಇಷ್ಟು ಹೊತ್ತು ಕುಳಿತು ಇಂತಹ ಹೊಟೇಲಿನಲ್ಲಿ ಟೀ ಕುಡಿದು, ಇಂತಹ ಲಾಡ್ಜಿನಲ್ಲಿ ಉಳಿದುಕೊಂಡು ಇಂತಿಂಥವರನ್ನು ಮಾತನಾಡಿಸಿ … ಎನ್ನುವ ಧಾಟಿಯಲ್ಲಿ ಬರೆದರೆ ಅದು ಪ್ರವಾಸ ಕಥನವೇ? ಹಾಗಾದರೆ ದಿನಚರಿಗೂ ಪ್ರವಾಸ ಕಥನಕ್ಕೂ ವ್ಯತ್ಯಾಸವೇನು?

ಪ್ರವಾಸದ ಸಮಯದಲ್ಲಿ ಭೇಟಿ ನೀಡಿದ ಸ್ಥಳದ ಮಹಿಮೆಯ ಬಗ್ಗೆ, ಪ್ರಾಕೃತಿಕ ಸೌಂದರ್ಯ, ಐತಿಹಾಸಿಕ ಮಹತ್ತುಗಳ ಬಗ್ಗೆ, ರಾಜ ಮಹಾರಾಜರುಗಳ ಜೀವನ ಚರಿತ್ರೆಯ ಬಗ್ಗೆ ಹೇಳುವ ಧಾಟಿಯ ಬರಹ ನಮಗೆ ಸಹಾಯಕವಾಗಬಹುದೇ? ಇದನ್ನು ಸ್ಥಳ ಪರಿಚಯ ಎಂದರೆ ಸಾಕಾಗುವುದಿಲ್ಲವೇ?

ಒಪ್ಪಿಕೊಳ್ಳುತ್ತೇನೆ… ಕೆಲವು ಪ್ರವಾಸದ ಬರಹಗಳನ್ನು ನಾವು ಯಾವ ಇನ್ನಿತರ ಸಿದ್ಧ ಸಾಹಿತ್ಯದ ಪ್ರಕಾರಗಳಿಗೂ ಸೇರಿಸಲಾಗುವುದಿಲ್ಲ. ಅಲೆಮಾರಿಯ ಅಂಡಮಾನ್, ಅಪೂರ್ವ ಪಶ್ಚಿಮ ಮುಂತಾದ ಪ್ರವಾಸ ಕಥನಗಳನ್ನು ನಾನು ಮೆಚ್ಚಿ ಓದಿದ್ದು ಅವು ಪ್ರವಾಸಕಥನಗಳು ಎಂಬ ಕಾರಣಕ್ಕೆ.

ಮನಸ್ಸಿಗೆ ಗೋಚರವಾದ ವಿಚಾರವನ್ನಿಲ್ಲಿ ಹಂಚಿಕೊಂಡಿದ್ದೇನೆ.