ಮಹೇಶರೆ,

'ತಿಂಗಳ್ ' ನೀವೆಂದಂತೆ ಆದಿದ್ರಾವಿಡಭಾಷೆಯ ಮೂಲದ್ದೇ ಇರಬಹುದು. ಕರಿ + ತಿಂಗಳು = ಕರಿದಿಂಗಳು(ಆದೇಶಸಂಧಿ) ಕೂಡ ಸರಿಯೇ; ಆದರೂ ಅದು ' ಕರ್ದಿಂಗಳು ' ಆದದ್ದು ಹೇಗೆಂಬುದೇ ನನ್ನ ಕುತೂಹಲ! ಅದೇನೇ ಇರಲಿ, ನನ್ನ ಪ್ರಿಯ ಮಿತ್ರರೊಬ್ಬರು ಮೊನ್ನೆ ' ಕರ್ದಿಂಗಳು' ಎಂಬ ಪ್ರಯೋಗ ಕುವೆಂಪುರವರ ರಕ್ತಾಕ್ಷಿ ನಾಟಕದಲ್ಲಿದೆ ಎಂದು ನೆನಪಿಸಿದರು. ಅಲ್ಲಿಗೆ ಪದವಿರುವುದು ಸ್ಪಷ್ಟವಾದರೂ, ವ್ಯುತ್ಪತ್ತಿ ಬಗೆಹರಿಯಲಿಲ್ಲ. ನೀವು ಕೊಟ್ಟ ಉದಾಹರಣೆಗಳು 'ರ ಕಾರ' ದ ಮುಂದಿನ ಪದಕ್ಕೆ ಆದೇಶ ಸೂಚಿಸಿವೆ; 'ರೇಫ'ದ ಮುಂದೆ ಅಲ್ಲ! ಒಂದುವೇಳೆ ರೇಫದ ಮುಂದಿನ ವರ್ಗೀಯ ವ್ಯಂಜನಕ್ಕೆ ಆದೇಶವಾಗುವ ಉದಾಹರಣೆ ತೆಗೆದುಕೊಂಡರೆ:
ಕಾರ್ + ಕತ್ತಲ್ = ಕಾರ್ಗತ್ತಲ್ (ಕಪ್ಪು ಕತ್ತಲೆ)
ಕಾರ್ + ಕಾಲ = ಕಾರ್ಗಾಲ (ಕರಿದಾದ ಕಾಲ) ಅಂತೆಯೇ,
ಕಾರ್ + ತಿಂಗಳ್ = ಕಾರ್ತಿಂಗಳ್, ಕಾರ್ದಿಂಗಳ್ ಆಗಿರುವ ಸಾಧ್ಯತೆಯಿದೆ. ಆದರೆ 'ಕರ್ದಿಂಗಳ್' ಆಗಿರಲಿಕ್ಕಿಲ್ಲವೆನಿಸುತ್ತದೆ.
ಆದ್ದರಿಂದ, ನೀವೆಂದಂತೆ ಕರಿ + ತಿಂಗಳು = ಕರಿದಿಂಗಳು ಆಗಿದ್ದು, ನಂತರ ಅದೇ ಆಡುಭಾಷೆಯ ರೂಪಾಂತರದಿಂದ ಕರ್ದಿಂಗಳು ಆಗಿರಬಹುದು.

ಆದರೆ, ಕರ್ದಿಂಗಳು ನೀವೆಂದಂತೆ 'ಕೃಷ್ಣ ಪಕ್ಷ'ವಾಗಲೀ, 'ತಿಂಗಳಿನ ಕರಿಯ ಭಾಗ' ವಾಗಲೀ ಅಲ್ಲ! ಏಕೆಂದರೆ :
ಪಕ್ಷ = ಹದಿನೈದು ತಿಥಿಗಳ ಗುಂಪು; ಭಾಗವಾಗಲೀ, ಆಂಗ್ಲದ 'ಪಾರ್ಟ್' ಆಗಲೀ ಅಲ್ಲ!
ಕರ್ದಿಂಗಳು = ಕರಿಯ ತಿಂಗಳು ; ಆದ್ದರಿಂದ ಅದು 'ಕರಿಯ ಪಕ್ಷ' ಹೇಗಾಗಲು ಸಾಧ್ಯ? ಅಲ್ಲವೇ?
ನಮಗೆ 'ತಿಂಗಳು' ಎಂಬ ಪದಕ್ಕೆ ಅರ್ಥ 'ಮಾಸ' ಎಂದು ಅಭ್ಯಾಸವಾಗಿ ಹೋಗಿರುವುದರಿಂದ ಈ ಗಲಿಬಿಲಿ. ತಿಂಗಳ್ ಎಂದರೆ ನಿಜವಾಗಿ 'ಚಂದ್ರ' ಎಂದರ್ಥ. ಆದ್ದರಿಂದ, ಕರ್ದಿಂಗಳು = ಕರಿಯ ಚಂದ್ರ = ಅಮಾವಾಸ್ಯೆ ಎಂದಾಗುತ್ತದೆಯಲ್ಲವೇ?

ಈಗ ರಕ್ತಾಕ್ಷಿಯ ಈ ಸಾಲನ್ನು ಓದಿದಾಗ ಏನೆನಿಸುತ್ತದೆಯೋ ನೋಡಿ:
"ಕರ್ದಿಂಗಳ ಕಗ್ಗತ್ತಲ ಕಾರ್ಗಾಲದ ರಾತ್ರಿ......."

ಇತರರೇನೆನ್ನುತ್ತಾರೋ ನೋಡೋಣ.
ನಿಮ್ಮವ
ಬೆನಕ

ಕನ್ನಡ ತಮಿೞನಷ್ಟು ಹೞೆಯದಲ್ಲ ಎನ್ನಲು ಒಂದಾದರೂ ನಿದರ್ಶನ ತೋಱಿಸಿ ಎಂದು ಓದಿಕೊಳ್ಳಿ.