ಪಾಪಪ್ರಜ್ಞೆ ಎಂಬ ವಿಷಯದ ಬಗ್ಗೆ ಚರ್ಚೆಯಲ್ಲಿ ಭೈರಪ್ಪನವರ ವಂಶವೃಕ್ಷ ಕಾದಂಬರಿಯಲ್ಲಿನ ಕಾತ್ಯಾಯನಿ ಪಾಪಪ್ರಜ್ಞೆಯಿಂದ ನರಳಿ ಸಾಯುತ್ತಾಳೆಯೇ ಎಂಬ ಸಂದೇಹ ವ್ಯಕ್ತವಾಗಿದೆ. ಈ ವಿಷಯದಲ್ಲಿ ನನ್ನ ಅಭಿಪ್ರಾಯ ಏನೆಂದರೆ ಆ ಪಾತ್ರದ ಚಿತ್ರಣವೇ ಸ್ವಲ್ಪconfusing ಆಗಿದೆ . ಮಾತೃತ್ವ ಎನ್ನುವುದು ಯುಗಗಳು ಕಳೆದರೂ ಒಂದೇ ತರಹ ಇರುತ್ತದೆ. ಮಗುವನ್ನು ಒಬ್ಬ ಪುರುಷನಿಗೋಸ್ಕರ ಬಿಟ್ಟು ಹೋಗುವ ಮಾತೆಯರು ಇಲ್ಲವೆಂದಲ್ಲ. ಆದರೆ ಕಾತ್ಯಯನಿಯಂತಹ ಸೌಮ್ಯ ಸ್ವಭಾವದ ಮಹಿಳೆ ಒಂದು ವೇಳೆ ಮಗುವನ್ನು ಬಿಟ್ಟು ಹೋಗುವ ನಿರ್ಧಾರ ತೆಗೆದುಕೊಂಡರೂ, ಮುದುಕಿಯಾಗುವವರೆಗೆ ಸರಿಯಾಗಿದ್ದು ಆಮೇಲೆ ಪಶ್ಚಾತ್ತಾಪ ಪಡುವುದು ಸ್ವಾಭಾವಿಕವೆನಿಸುವುದಿಲ್ಲ. ಯಾವುದೇ ಮಹಿಳೆಗೆ ಮಗುವನ್ನು ಬಿಟ್ಟ ನಂತರ ಮಗುವಿನ ನೆನಪು ನಿಮಿಷ ನಿಮಿಷಕ್ಕೂ ಕಾಡುವುದು ಖಚಿತ. ಅಷ್ಟು ಹತ್ತಿರದಲ್ಲಿದ್ದೂ ವರ್ಷಗಟ್ಟಲೆ ಮಗನನ್ನು ನೋಡಲು ಹೋಗದಿರುವುದು ತುಂಬ ವಿಚಿತ್ರವೆನಿಸುತ್ತದೆ. ಮಾವನವರನ್ನು ಎದುರಿಸಲು ಭಯವಾದರೂ, ಮಗುವನ್ನು ನೋಡುವ ಆಸೆಯು ಅವಳನ್ನು ಕಡೇಪಕ್ಷ ಕದ್ದುಮುಚ್ಚಿಯಾದರೂ ಮಗುವನ್ನು ನೋಡಲು ಪ್ರೇರೇಪಿಸಬೇಕಾಗಿತ್ತು.