ಸತೀಶರೆ,
ಕರ್ದಿಂಗಳು - ನಾನೂ ಕೇಳಿರಲಿಲ್ಲ; ಆದರೆ ಏಕೋ ಈ ಪದದ ವ್ಯುತ್ಪತ್ತಿ ಸರಿಯಾಗಿದ್ದಂತೆ ಕಾಣೆ. ಕನ್ನಡ ವ್ಯಾಕರಣಕ್ಕನುಗುಣವಾಗಿ:

ಬೆಳ್ + ತಿಂಗಳ್ = ಬೆಳ್ + ದಿಂಗಳ್ (ಆದೇಶಸಂಧಿ) = ಬೆಳ್ದಿಂಗಳ್ -> ಬೆಳ್ದಿಂಗಳು -> ಬೆಳದಿಂಗಳು ಆಗಿರುವುದು ದಿಟ. ಆದರೆ,

ಕರ್ದಿಂಗಳು = ಕರ್ + ದಿಂಗಳು ಎನ್ನುವುದು ಹೇಗೇ ಆದರೂ ಆದೇಶಸಂಧಿಯಾಗಿರಲಿಕ್ಕಿಲ್ಲ! ರೇಫ(ರ್)ದ ಮುಂದಿನ 'ತ'ಕಾರಕ್ಕೆ ಆದೇಶ ಬರುವ ಪ್ರಯೋಗ ಅಷ್ಟಾಗಿ ಕಾಣಸಿಗದು.ದಯವಿಟ್ಟು ನಿಮ್ಮ ಈ ಪದದ ಮೂಲ ತಿಳಿಸಿದರೆ, ಕುತೂಹಲಿಗಳಿಗೆ ಉಪಯೋಗವಾದೀತು.ನನಗೆನಿಸುವಂತೆ ಈ ಪದ ಕಾರ್ತಿಂಗಳ್ ಅಥವಾ ಕರಿತಿಂಗಳ್ ಆಗಿರುವ ಸಾಧ್ಯತೆ ಹೆಚ್ಚು.

ಮತ್ತೊಂದು ವಿಷಯವೆಂದರೆ, 'ತಿಂಗಳ್' ಎಂಬ ಪದ ತಮಿಳು ಮೂಲದ್ದಾಗಿದ್ದು, ಕನ್ನಡದಲ್ಲೂ, ತಮಿಳಿನಲ್ಲೂ 'ಚಂದ್ರ' ಎಂದರ್ಥ. ಬೆಳ್ದಿಂಗಳ್ ಎಂದರೆ ಬಿಳಿಯಾದ ಚಂದ್ರ -'ಪೂರ್ಣಚಂದ್ರ' ಅಥವಾ ಪೂರ್ಣಿಮೆಯ ಚಂದ್ರ. ಮಾಸಕ್ಕೊಮ್ಮೆ ಬೆಳ್ದಿಂಗಳಾದ್ದರಿಂದ ಮಾಸವೇ 'ತಿಂಗಳ್' ಆಗಿ ಬದಲಾಯಿತು! ಹಳೆಗನ್ನಡದ ಕವಿಗಳೂ ಬೆಳ್ದಿಂಗಳನ್ನು 'ಹುಣ್ಣಿಮೆ' ಅಥವಾ 'ಹುಣ್ಣಿಮೆಯ ಬೆಳಕು' ಎಂಬರ್ಥದಲ್ಲಿ ಬಳಸಿರುವುದು ಕಾಣಬರುತ್ತದೆ. ಬಿ.ಎಂ.ಶ್ರೀ ಯವರ ಇಂಗ್ಲಿಷ್ ಕವಿತೆಗಳನ್ನೇ ನೋಡಿ - 'ವಸಂತ' ಪದ್ಯದಲ್ಲಿ '...ಬನದಲಿ ಬೆಳದಿಂಗಳೂಟ..' ಎಂಬ ಪ್ರಯೋಗವಿದೆ.

ಆದ್ದರಿಂದ, ಬೆಳ್ದಿಂಗಳು - ಶುಕ್ಲಪಕ್ಷವಲ್ಲ; ಅದರ ಕೊನೆಯದಿನವಾದ ಪೂರ್ಣಿಮೆ. ಹಾಗಾಗಿ 'ಕಾರ್ತಿಂಗಳ್' ಎಂಬ ಪದವಿದ್ದರೂ ಅದು ಅಮಾವಾಸ್ಯೆಯಲ್ಲವೇ?

ಇತರರೇನು ಹೇಳುವರೋ ನೋಡೋಣ.

ನಿಮ್ಮವ
ಬೆನಕ