ಸುರಚಾಪಂಬೋಲೆ ವಿದ್ದುಲ್ಲತೆಗಳ ತೆಱವೋಲ್ಮಂಜುವೋಲ್ತೋಱಿ ಬೇಗಂ
ಪಿರಿಗುಂ ಶ್ರೀರೂಪಲೀಲಾಧನವಿಭವ ಮಹಾರಾಶಿಗಳ್ನಿಲ್ಲವಾರ್ಗಂ
ಪರಮಾರ್ತ್ಥಂ ಮೆಚ್ಚೆನಾನೀ ಧರಣಿಯುಳಿರವಾನೆನ್ದು ಸನ್ಯಾಸನಂ ಗೆ-
ಯ್ದುರುಸತ್ವನ್ನನ್ದಿಸೇನಪ್ರವರ ಮುನಿವರನ್ದೇವಲೋಕಕ್ಕೆ ಸಂದಾನ್||

ಇದೊಂದು ಪೂರ್ವದ ಹೞಗನ್ನಡದ ಪದ್ಯ
ಇದಱರ್ಥ:
ಸುರಚಾಪಂ +ಪೋಲೆ= ಕಾಮನ ಬಿಲ್ಲಿನಂತೆ, ವಿದ್ದ್ಯುಲ್ಲತೆಗಳ ತೆಱವೋಲ್=ಮಿಂಚಿನ ಬಳ್ಳಿಯ ತೆಱದಂತೆ ಬೇಗಂ =ಬೇಗ ತೋಱಿ ಶ್ರೀರೂಪಲೀಲಾಧನವಿಭವ ಮಹಾರಾಶಿಗಳ್, ಪರಮಾರ್ತ್ಥಂ= ರೂಪ ಲೀಲೆ ಹಣ ಐಶ್ವರ್ಯದ ರಾಶಿಗಳು ಹಾಗೂ ವಿಶೇಷ ಸಂಪತ್ತುಗಳು ಪಿರಿಗುಂ= ಬಹಳ ಕಾಲದವರೆಗೆ ಆರ್ಗಂ=ಯಾರಿಗೂ ನಿಲ್ಲವು=ನಿಲ್ಲುವುದಿಲ್ಲ. ಆನ್= ನಾನು ಈ ಧರಣಿಯುಳ್= ಈ ಭೂಮಿಯಲ್ಲಿ ಇರವಾನ್=ಇರುವುದನ್ನು(ಇರುವಿಕೆಯನ್ನು) ಮೆಚ್ಚೆನ್=ಇಷ್ಟಪಡುವುದಿಲ್ಲ. ಎನ್ದು=ಎಂದು ಉರುಸತ್ವನ್=ಮಹಾಶಯನಾದ ನನ್ದಿಸೇನಪ್ರವರ ಮುನಿವರನ್= ನಂದಿಸೇನ ಎಂಬ ಹೆಸರಿನ ಮಹಾಮುನಿಯು ದೇವಲೋಕಕ್ಕೆ ಸಂದಾನ್=ಸೇರಿದನು.