ಸುನಿಲ್,

ಇದು ನೇರವಾಗಿ ಈ ಚರ್ಚೆಯ ವಿಷಯ ಅಲ್ಲವಾದರೂ, ನಮ್ಮ ನಡುವಣ ಸಂವಾದವನ್ನು ಇನ್ನೊಂದು ಕಡೆಗೆ ಎಳೆಯುವುದಕ್ಕಿಂತ ಇಲ್ಲಿಯೇ ಮುಂದುವರೆಸುವ ಉದ್ದೇಶದಿಂದ ಇಲ್ಲಿಯೇ ಬರೆಯುತ್ತೇನೆ.

"ಸಂಸ್ಕೃತದ್ದೆಲ್ಲವನ್ನೂ ಒಪ್ಪಲೇಬೇಕು" ಎನ್ನುವ ಮಾತನ್ನು ನಾನೂ ವಿರೋಧಿಸುತ್ತೇನೆ. ಹಾಗೆಯೇ ನನ್ನ ಇಂಗ್ಲಿಷ್ ಪರವಲ್ಲದ (ನಾನು ಇಂಗ್ಲಿಷ್ ವಿರೋಧಿಯೂ ಅಲ್ಲ, ಕನ್ನಡದ ವಿಚಾರಕ್ಕೆ ಬಂದಾಗ ಇಂಗ್ಲಿಷ್ ದಬ್ಬಳಿಕೆಯನ್ನು ಸಂಸ್ಕೃತದ ದಬ್ಬಾಳಿಕೆಗಿಂತ ಹೆಚ್ಚು ವಿರೋಧಿಸುತ್ತೀನಿ!) ಧೋರಣೆ "ಅವರು ನಮ್ಮನ್ನು ಆಳಿದರು" ಅನ್ನುವ ಕಾರಣಕ್ಕೆ ಅಲ್ಲವೇ ಅಲ್ಲ. ಅವರು ನಮ್ಮನ್ನು ಆಳಲು ಬೇಕಾದಷ್ಟು ಸಾಮಾಜಿಕ-ರಾಜಕೀಯ-ಆರ್ಥಿಕ ಕಾರಣಗಳಿದ್ದವು; ಅದರ ಬಗ್ಗೆ ಈಗ ಪ್ರಸ್ತಾಪ ಬೇಡ ಬಿಡಿ. ಒಟ್ಟಿನಲ್ಲಿ ನನ್ನ ವಿರೋಧ ಆ ದೃಷ್ಟಿಯಿಂದ ಅಲ್ಲವೇ ಅಲ್ಲ. 

ಸಂಸ್ಕೃತದ ಪದ ಕಲಿತರೆ ಸಂಸ್ಕೃತ ಬಂದಹಾಗೆ ಆಗೋದಿಲ್ಲ ಅಂತ ನೀವು ಹೇಳಿದ್ದು ಸರಿ. ಆದರೆ ಇಂಗ್ಲಿಷ್ ಪದ ಕಲಿತ ಮಾತ್ರಕ್ಕೆ ಅದು ಬಂದಂತಾಗುವುದಿಲ್ಲ ಎನ್ನುವ ಮಾತನ್ನು ನಾನು ಸಂಪೂರ್ಣವಾಗಿ ಒಪ್ಪುವುದಿಲ್ಲ. ಯಾಕೆಂದರೆ ಭಾಷೆಯ ದೈನಂದಿನ ಬಳಕೆ ಕೂಡ ಅಷ್ಟೇ ಮುಖ್ಯ ನೋಡಿ. ಯಾರೇನೇ ಅಂದರೂ ಸಂಸ್ಕೃತ ಈಗ ಅಷ್ಟಾಗಿ ಬಳಕೆಯಲ್ಲಿಲ್ಲ (ದಿನನಿತ್ಯದ ಬಳಕೆ). ಆದರೆ ಇಂಗ್ಲಿಷ್ ದಿನನಿತ್ಯ ಎಲ್ಲೆಂದರಲ್ಲಿ ಬಳಕೆಯಲ್ಲಿದೆ. ಒಮ್ಮೆ "ಬಳಕೆದಾರ/ಸದಸ್ಯ" ಅನ್ನುವ ಪದಕ್ಕೆ "ಯೂಸರ್" ಅನ್ನುವುದನ್ನು ನಾವು ಸ್ವೀಕರಿಸಿದರೆ, ಅದು ಸರಪಳಿಯಂತೆ ಇನ್ನೂ ಎಲ್ಲೆಲ್ಲೋ ಎಳೆದುಕೊಂಡು ಹೋಗುವ ಸಂಭವ ಹೆಚ್ಚು. "ಚಲನ ಚಿತ್ರ" ಪದವನ್ನು ನಾವು ತಿರಸ್ಕರಿಸಿದೆವು. ಆದರೆ ಈಗ ಅದಕ್ಕೆ ಬದಲಾಗಿ ಇರೋದು "ಸಿನೆಮಾ" ಎಂಬ ಆಂಗ್ಲ ಪದ. ಪತ್ರಿಕೆಗಳಲ್ಲಿ ಚಲನ ಚಿತ್ರ ಅಂತೆಲ್ಲ ಬರೆದರೂ ಕೂಡ, ನಿಜ ಹೇಳಿ, ನಾವೇ ಮಾತಾಡುವಾಗ ನಮಗೆ ಬರೋದು "ಬಾ, ಸಿನೆಮಾಗೆ ಹೋಗೋಣ" ಅಂತಲೇ ಅಲ್ಲವೇ? ಇದೇ ರೀತಿ ಪ್ರತಿ ಪದಕ್ಕೂ ಆಗುತ್ತಾ ಹೋದರೆ ಕೊನೆಗೆ ಕನ್ನಡವೂ ಇರುವುದಿಲ್ಲ, ಮತ್ತು ಈಗಿರುವ "ಸಂಸ್ಕೃತಕನ್ನಡ"ವೂ ಇರುವುದಿಲ್ಲ. ಇಂಗ್ಲಿಷ್ ಎಲ್ಲದರಲ್ಲಿ ಒಂದು ಬಗೆಯ "ಸಮಮಟ್ಟ" ತಂದು ಬಿಡುತ್ತೆ. ಈ ಅಂಶವನ್ನೇ ಜಾನಕಿಯವರ ಅಂಕಣದಲ್ಲಿ ಬಹಳ ಚೆನ್ನಾಗಿ ಬರೆದಿದ್ದಾರೆ ಅಂತ ನಾನೊಮ್ಮೆ ಎಲ್ಲರ ಜತೆ ಹಂಚಿಕೊಂಡಿದ್ದೆ. (ನೋಡಿ: ಓದುವ ಸುಖ, ಬರೆಯುವ ಸುಖ...)

ಸಂಸ್ಕೃತದ ಹೇರಿಕೆಯನ್ನು ತಡೆಯೋಣ, ಆದರೆ ಅದಾಗಲಿಲ್ಲ ಅಂದ ಮಾತ್ರಕ್ಕೆ ಈಗಾಗಲೇ ಕನ್ನಡದಲ್ಲಿ ಬಳಕೆಯಲ್ಲಿರುವ ಸಂಸ್ಕೃತ ಮೂಲದ ಪದವನ್ನು ತೆಗೆದು ಇಂಗ್ಲಿಷನ್ನು ಅದರ ಜಾಗದಲ್ಲಿ ಕೂರಿಸುವುದು ಬೇಡ ಅಂತ ನನ್ನ ಅನಿಸಿಕೆ. ನೀವೇ ಹೇಳಿದಂತೆ ಉದಾ: "ಆಗಮನ"ಕ್ಕೆ ಬದಲಾಗಿ "ಬರುವಿಕೆ" ಎಂದು ಬಳಸಲು ಪ್ರಯತ್ನಪಡೋಣ. ಅದರ ಬಗ್ಗೆ ನಾನು ಯಾವ ಚಕಾರವನ್ನೂ ಎತ್ತುತ್ತಿಲ್ಲ. ಆದರೆ ಆಕಸ್ಮಾತ್ ಅದು ಸಾಧ್ಯವಾಗಲಿಲ್ಲ ಅಂದ ಮಾತ್ರಕ್ಕೆ, "ಆಗಮನ ಅನ್ನುವ ಪ್ರಯೋಗ ಕೂಡ ಬೇಡ, entry ಅಂತಲೇ ಇರಲಿ; ಕನ್ನಡದ ಪದ ಬಳಕೆಗೆ ಬರಲಿಲ್ಲ ಅಂದಮೇಲೆ ಯಾವ ಭಾಷೆಯದಾದರೇನು, ಸಂಸ್ಕೃತದ್ದು ಮಾತ್ರ ಆಗಬಾರದು ಅಷ್ಟೇ", ಅಂದರೆ ಅದು ಇಂಗ್ಲಿಷಿಗೆ ಹೆಬ್ಬಾಗಿಲು ತೆರೆದಂತೆ ಅಂತ ನನ್ನ ಭಾವನೆ. ಹಾಗಾದ ಪಕ್ಷದಲ್ಲಿ ನಾವು ಈಗಿರುವ ಕನ್ನಡಪದಗಳನ್ನೂ ಇನ್ನಷ್ಟು ಕಡಿಮೆ ಮಾಡುತ್ತಾ ಹೋಗುತ್ತೇವೆ. ನನ್ನ ಇಡಿಯ ಪ್ರತಿಕ್ರಿಯೆಯ ಸಾರಂಶ ಇದಾಗಿತ್ತು.

ಒಳ್ಳೆಯ ಪ್ರಬಂಧಗಳು ಇಂಗ್ಲಿಷಿನಲ್ಲೂ ಬರುತ್ತಿವೆ;ನಿಜ. ಆದರೆ ನಾಳೆ ಕನ್ನಡದ ವಿಷಯದ ಬಗ್ಗೆ ಪ್ರೌಢ ಪ್ರಬಂಧವೊಂದನ್ನು ಇಂಗ್ಲಿಷಿನಲ್ಲಿ ಓದಬೇಕಾದ ಸ್ಥಿತಿ ಬಂದರೇನು ಗತಿ ಅಂತ ನನ್ನ ಆತಂಕ. ಹೇಗಿರುತ್ತೆ ನೀವೇ ಯೋಚಿಸಿ. ಆಗ ನಾವೇ ಅದನ್ನು ವಿರೋಧಿಸುತ್ತೇವೆ ತಾನೇ? ಆ ಸ್ಥಿತಿ ತಂದುಕೊಳ್ಳುವುದು ಬೇಡ. ನಾವೇನೇ ಹೇಳಿದರೂ ಕೊನೆಗೂ ಭಾಷೆಯ ಗತಿಯನ್ನು ನಿರ್ಧರಿಸುವುದು ಅದರ ಬಳಕೆ ಅಂತ ನನಗನ್ನಿಸುತ್ತೆ. ಇಂಗ್ಲಿಷ್ ಪದಗಳನ್ನೂ ನಾವು ಸಾಕಷ್ಟು ಒಪ್ಪಿಕೊಂಡಿದ್ದೇವೆ. ಆ ಪರಿ ಬಳಸಿಯೇ ತಾನೆ "ಸಿನೆಮಾ, ಬಸ್ಸು, ಟ್ರೈನು, ಫೋನು..." ಇವೆಲ್ಲ ಕನ್ನಡದ್ದೇ ಪದಗಳಾಗಿರೋದು! ಏನಂತೀರಾ?

ಸಂಕಲನ ಸಂವಾದ ಚೌಕದಂತಹ ಅನುವಾದಗಳನ್ನು ಯಾರು ಮಾಡಿದ್ದರೋ ಗೊತ್ತಿಲ್ಲ. ಪ್ರತಿಯೊಬ್ಬರೂ ಅನುವಾದಿಸುವಾಗ ಅವರಿಗೆ ಸೂಕ್ತ ಅನ್ನಿಸುವಂತೆ ಅನುವಾದ ಮಾಡಿರುತ್ತಾರೆ. ಹಾಗಾಗಿ ಇಂತಹ ಕಠಿಣ ಪದಗಳು ಅಲ್ಲಲ್ಲಿ ಸಿಕ್ಕೇ ಸಿಗುತ್ತವೆ. ಇಂತಹ ಕಡೆ ಕನ್ನಡದ್ದೇ, ಆದರೆ ಸರಳ ಪದಗಳನ್ನು ಹುಡುಕೋಣ. ನಾಳೆ ಕನ್ನಡೀಕರಣಗೊಂಡ ಪದಗಳನ್ನು ನೋಡಿ ಇನ್ನೊಬ್ಬರು "ಕನ್ನಡದ ಪದಗಳೂ ಕಠಿಣವೇ" ಅನ್ನಲು ಆಗದಿರುವ ರೀತಿಯಲ್ಲಿ ಸರಳ, ತಿಳಿಗನ್ನಡ ಪದಗಳನ್ನು ಹುಡುಕೋಣ. ಆದರೆ Edit Dialog Box ಅಂತ ಒಪ್ಪಿಕೊಳ್ಳುವ ಅವಶ್ಯಕತೆಯಿಲ್ಲ ಅಲ್ಲವೇ? Editಗೆ "ತಿದ್ದುವ..." ಅನ್ನುವ ರೀತಿ ಶುರು ಮಾಡಿ ಯಾವುದಾದರೂ ಹೊಸ ಪದವನ್ನು ಹುಡುಕೋಣ. ನಮಗೆ ಆಗಲಿಲ್ಲವೇ, ಯಾರಾದರೂ ತಜ್ಞರನ್ನೇ ಕೇಳೋಣ. ನಮಗೆ ಹೊಸ, ಸರಳ ಕನ್ನಡ ಪದಗಳು ಬೇಕು, ಹುಡುಕಿಕೊಡಿ ಅಂತ. ಬೇಕಿದ್ದಲ್ಲಿ ಕನ್ನಡನಾಡಿನ ಬೇರೆ ಭಾಗದ ಕನ್ನಡ ಪದಗಳನ್ನು (ಧಾರವಾಡ ಕಡೆ, ಮಂಗಳೂರಿನ ಕಡೆ) ಬರಮಾಡಿಕೊಳ್ಳೋಣ. ಕನ್ನಡ ಅಂದರೆ ಕೇವಲ ಮೈಸೂರು ಕನ್ನಡ ಮಾತ್ರ ಅಲ್ಲ ಅಲ್ಲವೇ? ಈ ನಿಟ್ಟಿನಲ್ಲಿ ಯೋಚಿಸೋಣ ಅಂತ ನನ್ನ ಆಶಯ.

ಇನ್ನೂ ಟೈಪಿಸಲು ಕಷ್ಟವೆನಿಸುತ್ತಿದೆ. ಸಧ್ಯಕ್ಕೆ ಇಷ್ಟಕ್ಕೇ ಮುಗಿಸುವೆ. ಏನನ್ನಿಸಿತು ಹೇಳಿ.

- ಶ್ಯಾಮ್ ಕಿಶೋರ್