ನನ್ ಮದುವೆಯಾದ ಸುದ್ದೀನ್ ನಮ್ ಸುನಿಲ ಆಗಲೇ ಹೇಳಿದ್ದಾನೆ.

ಹು ನನ್ ನಲ್-ಮದುವೆ ಸಪ್ಟೆಂಬರ್‍ ೨೦೦೮ರ ಒಂಬತ್-ಹತ್-ಹನ್ನೊಂದು ಮೂರುದಿವಸ ಬೆಂಗಳೂರಲ್ಲೇ ನಡೀತು.

ಆದರೆ ಒಂಬತ್ತು ಸೋಮವಾರ ದೇವರ ಸಮಾರಾಧನೆಯೆಂದು ಎಂಟಕ್ಕೆ ನಮ್ಮ ದೊಡ್ಡಮ್ಮ, ದೊಡ್ಡಮ್ಮನ ಮಗಳು ಅವಳ ಮಗಳು ಎಲ್ಲ ಬಂದಿದ್ದರು. ಮನೇಲಿ ವಯಸ್ಸಾದವರಿಗೆಲ್ಲ ಹಾಸಿಗೆ ಸಿಕ್ಕಿತು.. ವಯಸ್ಸಾಗದ ನಾನು, ನನ್ ತಮ್ಮ,ನನ್ ಗೆಳೆಯ+ರೂಮ್ ಮೇಟಿಗೆ ಜಮಕಾನವೇ ಗತಿಯಾಯ್ತು... ಅಂದು ಇರಳೆಲ್ಲ ಹರಟಿ ನಿದ್ದೇ ಮಾಡಿದ್ದು ಅಶ್ಟಕ್ಕಶ್ಟೇ......

ಒಂಬತ್ತಕ್ಕೆ ಚಪ್ಪರ ಪೂಜೆ, ದೇವರ ಸಮಾರಾಧನೆ, ನಾಂದಿ, ನವಗ್ರಹ ಹೋಮ, ಮೃತ್ಯುಂಜಯ ಹೋಮ ಮುಂತಾದವು ಇದ್ದವು... ಇನ್ನೂ ನೆಂಟರು ಬಂದರು.. ಅವತ್ತು ಇರಳೂ ನಮಗೆ ಜಮಕಾನವೇ ಗತಿ..

ಮಾರನೇ ದಿನ ನಮ್ ಬಸ್-ದಿಬ್ಬಣ ನಮ್ಮೂರಿಂದ ಬೆಂಗಳೂರಿಗೆ ಸಂಜೆ ತಲುಪಿತು. ಸಂಜೆ ವರಪೂಜೆ ಮುಂತಾದವು.. ಇನ್ ಮದುವೆ ಚತ್ರದಲ್ಲಿ ನಿದ್ದೇ ಬಂದೀತೇ? ನಾನ್ ಬರೀ ಮಲಗಿದ ಶಾಸ್ತ್ರ ಮಾಡಿದಶ್ಟೇ...

ಇನ್ ಮದುವೆ ದಿವಸ ಬೆಳಬೆಳಗ್ ಐದಕ್ಕೆ ಎಣ್ಣೇಶಾಸ್ತ್ರ ಅಂತ ಎಬ್ಬಿಸಿ ಕೂರಿಸಿದರು. ತಲೆ ಸ್ನಾನ ಬೇರೆ ಮಾಡಬೇಕಾಯ್ತು. ತಿಂಡಿ ತಿನ್ನೋ ಹಾಗಿಲ್ಲ ಅಂತ ಮೂರು ಲೋಟ ಹಾಲು ಕುಡಿಯಕ್ಕೆ ಬಿಟ್ಟರು. ಸರಿ ಸ್ನಾನ ಆದ ಮೇಲೆ ಸಂಕಲಕೆ ಪಂಜೆ ಅಂತ ಒಂದು ತೆಳುವಾದ ಕಜ್ಜೆ ಪಂಜೆ ಉಡಿಸಿ, ಪೇಟ ಮುಡಿಸಿ, ಕೈಗೆ ಊರುಗೋಲು ಬೀಸಣಿಗೆ ಹಿಡಿಸಿ, ಕಾಶಿಯಾತ್ರೆಗೆ ಹೊರಡಿಸಿದರು. ನನಗೋ ನಿದ್ದೇ ಸಾಲದಕ್ಕೆ ಎಲ್ಲದಕ್ಕೆ ಹು ಹು ಎನ್ನುತ್ತಿದ್ದೆ.

ಕಾಶಿಯಾತ್ರೇಲಿ ನಮ್ ಮಾವ ಕಾಲು ತೊಳೆದು, ಹೊಸ ಚಪ್ಪಲಿ ಕೊಟ್ಟು ಹಸೆಮಣೆ ಕರೆದುಕೊಂಡು ಹೋದರು. ಆ ಮೇಲೆ ’ತೆರೆ’, ’ಧಾರೆ’, ’ತಾಳಿ’, ಕೆಲವರು ವೋದಿಸಿದ್ದು.. ಮುಗಿದು ’ಭೌಮ’ವಾಗಿತು. ನನಗೆ ಹೊಟ್ಟೆ ಪಕಪಕ ಎಂದು ಹಸಿದಿತ್ತು..

ಚನ್ನಾಗಿ ಊಟವಾದ ಮೇಲೆ ನನಗೆ ಜೋರು ನಿದ್ದೆ ಎಳೆಯಲು ಸುರುವಾಯ್ತು.. ಅಶ್ಟರಲ್ಲೇ ಪುರೋಹಿತರು ನಾಗೋಲಿಗೆ ಬನ್ನಿ ಎಂದು ಕರೆದುಕೊಂಡು ಹೋದರು.. ನನಗೆ ಹೇಗೆ ನಿದ್ದೇ ಅಂದರೆ.. ಅವರು ಅದೇನೇನೇನು ಮಾಡಿಸಿದರೋ ಒಂದೂ ನೆನಪೇ ಇಲ್ಲ ಸರಿಯಾಗಿ.. ಅವಳು ಒಂದೆರಡು ಸಲ ಮೊಣಗೈಯಿಂದ ತಿವಿದು ಎಬ್ಬಿಸ್ತಿದ್ದಳಂತೆ.. ನಾಗೋಲಿ ತಾಳೀನ್ ಆ ನಿದ್ದೆ ಮಂಪರಲ್ಲೇ ಕಟ್ಟಿದ್ದೂ ಆಯಿತು....

ಎಲ್ಲ ಮುಗಿದ ಮೇಲೆ ಮೊದಲು ಹೋಗಿ ಮುಕ್ಕಾಲುಗಂಟೆ ನಿದ್ದೇ ಮಾಡಿದೆ ಅಶ್ಟೇ.. ತಿರುಗಿ ರಿಸೆಪ್ಶನ್ನು ಅಂತ ಎಬ್ಬಿಸಿ ಮೂರುವರೆ ಗಂಟೆ ನಿಲ್ಲಿಸಿದ್ದರು....

ನಾನು ನಿದ್ದೇಲಿ ನಾಗೋಲಿ ತಾಳಿ ಕಟ್ಟಿದನ್ನ ವಿಡಿಯೋ ಬೇರೆ ಮಾಡಿದ್ದಾರೆ.. ಇನ್ ನನ್ ಜನುಮ ಪೂರ್ತಿ ಅದನ್ನ ನೋಡಿ ಆಡಿಕೋತಾರೆ..