ಅಂತರ್ಜಾಲ ಎಲ್ಲರಿಗೂ ಗೊತ್ತಿರುವಂತೆ ತೀರಾ ಆಧುನಿಕ ಮಾಧ್ಯಮ . ಆದರೆ ದಿನದಿಂದ ದಿನಕ್ಕೆ ಅದು ಪಡೆದುಕೊಳ್ಳುತ್ತಿರುವ ಸಾಹಿತ್ಯಕ ಆಯಾಮವಂತೂ ಆಶ್ಚರ್ಯಪಡುವಂತಿದೆ . ಸಾಹಿತ್ಯ ಪ್ರಪಂಚವನ್ನು ಸಾರ್ವತ್ರಿಕ ಮತ್ತು ಮುಕ್ತವಾಗಿಸುವಲ್ಲಿ ಅಂತರ್ಜಾಲದ ಸಾಧ್ಯತೆಗಳು ಹೊಸ ಜಗತ್ತನ್ನೇ ತೆರೆದಿವೆ . ವ್ಯಕ್ತಿಯೊಬ್ಬನ ಅನುಭವ ಅಭಿಪ್ರಾಯಗಳೇ ಸಾಹಿತ್ಯದ ಪರಿ ಭಾಷೆಯಲ್ಲಿ ವ್ಯಕ್ತವಾಗುತ್ತವೆ ಎನ್ನುವುದಾದರೆ ಪ್ರತಿಯೊಬ್ಬ ಸಾಮಾನ್ಯನಲ್ಲೂ ಒಬ್ಬ ಸಾಹಿತಿ ಇದ್ದೇ ಇರುತ್ತಾನೆ . ಅವನು ಪ್ರಕಟಗೊಳ್ಳಲು ಸಾರ್ವತ್ರಿಕ ಆಯಾಮ ದೊರೆತಾಗ ಏನಾಗಬಲ್ಲದೆಂಬುದೇ ಪ್ರಚಲಿತ ಅಂತರ್ಜಾಲದ ವಿಸ್ಮಯಪೂರ್ವಕ ದರ್ಶನ .

ಕನ್ನಡದ ಮಟ್ಟಿಗೆ ’ಸಂಪದ’ ತೀರಾ ಮುಕ್ತವಾದ ಅಷ್ಟೇ ಆರೋಗ್ಯಕರ ವ್ಯವಸ್ಥೆಯಿಂದ ಕೂಡಿದ ತಾಣ . ಕನ್ನಡದಲ್ಲಿ ಇಷ್ಟು ಮುಕ್ತ ವ್ಯವಸ್ಥೆ ಇರುವ ತಾಣ ಬೇರೆ ಯಾವುದಾದರೂ ಇದೆಯೋ ಇಲ್ಲವೋ ಸದ್ಯಕ್ಕೆ ನನಗೆ ಗೊತ್ತಿಲ್ಲ . ಆದರೆ ಸಂಪದದ ಈ ಮುಕ್ತತೆಯ ಗುಣ ಎಲ್ಲಿಯೂ ದುರುಪಯೋಗವಾದ ಉದಾಹರಣೆಗಳು ನನಗೆ ಕಂಡು ಬಂದಿಲ್ಲ . ಕೆಲವು ಕನ್ನಡ ತಾಣಗಳಲ್ಲಿ ಬರುವ ಪ್ರತಿಕ್ರಿಯೆಗಳ ಭಾಷೆ ಮತ್ತು ಮನೋಭಾವಗಳ ಅಸಹ್ಯ ಪ್ರದರ್ಶನಗಳನ್ನು ಕಂಡು ಮನಸ್ಸು ಆಘಾತಗೊಳ್ಳುವ ವೇಳೆಗೆ , ಇಷ್ಟೊಂದು ಮುಕ್ತತೆಯ ಸಂಪದದಲ್ಲಿ ಬರೆಯುವವರು ತಾವೇ ಹೇರಿಕೊಂಡಿರುವ ಸ್ವಯಂ ಶಿಸ್ತು ಮತ್ತು ಸಂಯಮ ತುಂಬಾ ಆಶ್ಚರ್ಯವನ್ನೂ , ಸಂತಸವನ್ನೂ ತರುತ್ತದೆ .

ಇಲ್ಲಿ ಎಲ್ಲ ಬಗೆಯ ಬರಹಗಾರರಿದ್ದಾರೆ . ಯುವ ಮನಸ್ಸಿನ ತುಂಟತನವಿದೆ ಆದರೆ ಅಶ್ಲೀಲವಿಲ್ಲ . ಸಾಮಾನ್ಯ ಬರಹಗಾರರಿಂದ ಪರಿಣಿತರವರೆಗೂ ಇದ್ದಾರೆ .ಎಡವುತ್ತಾ ನಡೆಯುವ ಹೊಸಬರಿದ್ದಾರೆ . ಯಾವ ಮಗುವೂ ಎಡವುತ್ತಲೇ ನಡೆಯುವುದನ್ನು ಕಲಿಯುತ್ತದೆ ; ಯಾರಿಗೆ ಗೊತ್ತು ? ಇಂದು ಎಡವುತ್ತಾ ಬೀಳುತ್ತಾ ನಡೆಯುವ ಮಗು , ನಾಳಿನ ಅದ್ಭುತ ಓಟಗಾರನಾಗಿಬಿಡಬಹುದು !

ನಿರ್ವಾಹಕರ ನಿಯಂತ್ರಣದಲ್ಲಿಯೇ ಲೇಖನಗಳು ಪ್ರಕಟವಾಗುವ ಅನೇಕ ತಾಣಗಳಲ್ಲಿ ಕಂಡುಬರುವ ಲೇಖನಗಳ ನೀರಸತೆ , ಏಕತಾನತೆ , ಆತ್ಮರತಿಗಳನ್ನು ಕಂಡ ಮೇಲೆ ಮುಕ್ತ ತಾಣ ಎಷ್ಟೊಂದು ಉಪಯುಕ್ತ ಎನ್ನುವುದು ಮನವರಿಕೆಯಾಗದಿರದು . ಮುಕ್ತ ತಾಣದಲ್ಲಿ ಲೇಖನವೊಂದು ತನ್ನೆಲ್ಲಾ ಅಭಿಪ್ರಾಯಗಳೊಡನೆ ಪ್ರಕಟವಾದ ತಕ್ಷಣ , ಅಲ್ಲಿಯೇ ಪ್ರತಿಕ್ರಿಯೆಗಳ ರೂಪದಲ್ಲಿ ಪರ ವಿರೋಧಗಳು ಪ್ರಕಟವಾಗತೊಡಗುತ್ತವೆ .ಇದು ಲೇಖಕನೊಬ್ಬನಿಗೆ ಬಲು ದೊಡ್ಡ ಲಾಭ , ಅವನ ಮನೋಭಾವದ ಓರೆ ಕೋರೆಗಳನ್ನೂ , ವಿಷಯವೊಂದರ ವಿವಿಧ ಮುಖಗಳನ್ನೂ ಪ್ರತಿಕ್ರಿಯೆಗಳು ಲೇಖಕನೆದುರೇ ವಿಶದವಾಗಿ ಬಿಚ್ಚಿಡತೊಡಗುತ್ತವೆ . ಇದು ಲೇಖಕನನ್ನು ಜಾಗೃತಗೊಳಿಸುವುದಲ್ಲದೆ ಅವನನ್ನೇ ಅವನು ಪುನರ್ವಿಮರ್ಶಿಸಿಕೊಳ್ಳುವ ; ವಿಶ್ಲೇಷಿಸಿಕೊಳ್ಳುವ ಅವಕಾಶಗಳನ್ನು ತೆರೆಯುತ್ತದೆ . ಆದರೆ ಪರ ವಿರೋಧ ಎರಡನ್ನೂ ಮಂದಹಾಸದಿಂದ ಸ್ವೀಕರಿಸುವ ಸ್ವಭಾವ ಲೇಖಕನಿಗಿದ್ದರೆ ಅವನು ಬೆಳೆಯಲು ಅದೇ ಸಹಕಾರಿ .
ಇನ್ನೂ ಬರೆಯಬಹುದು ಸದ್ಯಕ್ಕೆ ಇಷ್ಟು ಸಾಕು .